मुंबई - मोसमी पाऊस परतला असला तरी हवामानात झालेल्या बदलामुळे दिवाळीत पावसाची शक्यता वर्तवण्यात आली आहे. कोकण आणि मध्य महाराष्ट्रात काही ठिकाणी तुरळक पाऊस पडण्याचा अंदाज भारतीय हवामान विभागाने वर्तवला आहे. 2 नोव्हेंबरनंतर पुढील चार ते पाच दिवस पावसाची स्थिती असेल, असेही हवामान विभागाने सांगितले आहे.
4-10 नोव्हेंबरदरम्यान पाऊस?
४-१० नोव्हेंबरदरम्यान कमी दाबाचे क्षेत्र दक्षिण आणि पूर्व बंगालच्या उपसागरात तयार होणार आहे. हे क्षेत्र निर्माण झाल्यानंतर 10 नोव्हेंबरदरम्यान पाऊस पडण्याची शक्यता आहे. दरम्यान, कमी दाबाचा पट्टा अधिक तीव्र होण्याची शक्यता कमी आहे, तो पुढे सरकण्याची शक्यता आहे.
बंगालच्या उपसागरात कमी दाबाचा पट्टा
बंगालच्या उपसागरात निर्माण झालेल्या कमी दाबाच्या पट्ट्यामुळे अनेकदा महाराष्ट्रात परिणाम दिसतच असतो. श्रीलंकेच्या किनारपट्टी भागामध्ये कमी दाबाचा पट्टा निर्माण होणार असल्याची शक्यता आहे. परिणामी दक्षिण भारत आणि मध्य महाराष्ट्रातदेखील हलक्‍या स्वरूपाचा पाऊस पडण्याची शक्यता आहे. त्यामुळे दिवाळीत कोकण आणि मध्य महाराष्ट्रात पाऊस पडण्याची शक्यता आहे.
कमी दाबाचा पट्टा म्हणजे काय?
विषुववृत्ताच्या दोन्ही बाजूंस ५० उत्तर ते ५० दक्षिण अंशांच्या दरम्यान हा कमी दाबाचा पट्टा पसरलेला आहे. या अक्षवृत्तांच्या दरम्यान वर्षभर सूर्यकिरणे जवळजवळ लंबरूप पडतात. त्यामुळे तापमान जास्त असते व हवेचा दाब कमी असतो, कारण तापलेली हवा हलकी होऊन वर जात असते. या पट्टय़ात बराच काळ हवा ही शांत असल्याने तेथे वारे वाहत नाहीत, म्हणून त्याला कमी दाबाचा पट्टा असे म्हणतात.
