पक्षाने आदेश दिल्यास स्वतंत्र लढू, भाजप आमदार दरेकर यांचा निर्धार

शिवसेना आणि भाजपची युतीची ग्वाही खुद्द मुख्यमंत्री देवेंद्र फडणवीस आणि शिवसेनेचे पक्षप्रमुख उद्धव ठाकरे यांनी दिली असली तरी जागावाटपाचा घोडे अजूनही पुढे सरकले नाही. त्यामुळे  दोन्ही पक्षांनी स्वतंत्र लढण्याची तयारी ठेवली असल्याचे चित्र दिसत आहे.

मुंबई - युतीचा निर्णय पक्षश्रेष्ठी घेतील, पक्षाने आदेश दिल्याने स्वतंत्र लढायची तयारी असल्याचे भाजपचे आमदार प्रवीण दरेकर यांनी सांगितले आहे. गृहनिर्माण सोसायट्यांच्या मुद्यावर आयोजित केलेल्या पत्रकार परिषदे दरम्यान ईटीव्ही भारतशी बोलताना त्यांनी स्वतंत्र लढण्याची तयारी असल्याचे स्पष्ट केले.

येत्या १७ सप्टेंबर दरम्यान विधानसभा निवडणूक घोषित होण्याची चिन्ह आहेत. मात्र, अद्यापही भाजप आणि शिवसेनेकडून जागा वाटपाचा प्रश्न निकाली निघाला नाही. राष्ट्रवादीचे भास्कर जाधव यांच्या शिवसेना प्रवेशाच्यावेळी शिवसेनेचे पक्षप्रमुख उद्धव ठाकरे यांनी अप्रत्यक्षपणे मुख्यमंत्री देवेंद्र फडणवीस यांच्यावर नाराजी व्यक्त केली होती. शिवसेनेच्या उमेदवारांची यादी ही मुख्यमंत्री करतील असे खोचक विधान ठाकरे यांनी केले होते. त्यामूळे महायुतीत आलबेल नसल्याचे चित्र समोर येत आहे.

हेही वाचा - 'वंचित'मुळे भाजपला लोकसभा निवडणुकीत फायदा - शरद पवार

एकीकडे मुख्यमंत्री महाराष्ट्रभर महाजानदेश यात्रेच्या निम्मिताने भाजपचा प्रचार करत आहेत. शिवसेनेचे नेते आदित्य ठाकरे जन आशीर्वाद यात्रेच्या माध्यमातून जनतेशी संवाद साधत आहेत. मात्र या यात्रेत कुठेही महायुतीच्या जागावाटपाची चर्चा होत नाही. तर दुसरीकडे भाजपकडे असलेल्या मतदारसंघातील अन्य पक्षाचे नेते थेट शिवसेनेत सामील होत आहेत. त्यामुळे स्वबळाची शक्यता नाकारता येत नसल्याचे भाजपचे नेते खाजगीत सांगत आहेत.

हेही वाचा - 'उदयनराजे दिवस-रात्र काय करतात जनतेला ठाऊक, मतदाराच त्यांना दाखवतील'

लोकसभेच्या निवडणुकीदरम्यान सत्तेचा सामान वाटा मिळण्याच्या बोलीवर युती होत असल्याचे उद्धव ठाकरे यांनी सांगितले होते. मात्र नुकत्याच झालेल्या लोकसभा निवडणुकीत भाजपने अनेक मतदारसंघात आघाडी घेत घवघवीत यश मिळवले आहे. त्यामुळे भाजपच्या नेत्यांच्या आशा पल्लवित झाल्या असून शिवसेनेला समान जागा देण्याची भाजपची तयारी नसल्याचेही राजकीय वर्तुळात चर्चिले जात आहे. २८८ विधानसभेच्या जागांपैकी शिवसेनेला १२० जागा देऊन १५३ जागांवर भाजपने लढावे तसेच १२ जागा मित्रपक्षांना द्याव्यात, असा मतप्रवाह भाजपात आहे. मात्र, १२० जागांवर शिवसेना युती करणार की नाही याबाबाबतही भाजपच्या नेत्यांमध्ये मत मतांतरे आहेत.

हेही वाचा - सत्ताधारी धर्माच्या नावाने दहशत निर्माण करतायेत; पवारांचे सत्ताधाऱ्यांवर टीकास्त्र

भाजपचे राष्ट्रीय कार्याध्यक्ष जे. पी. नड्डा यांच्या नेतृत्वात शनिवारी वसंत स्मुती कार्यालयात भाजपचे ज्येष्ठ नेते पदाधिकारी आणि खासदारांची बैठक होणार आहे. या बैठकीत नड्डा स्वबळासंदर्भात पक्षातील नेत्यांचा विचार घेणार असल्याची माहिती मिळत आहे.