मुंबई - पत्राचाळ पुनर्विकास घोटाळ्याप्रकरणी प्रकरणी ईडीने अटक केल्यानंतर आर्थर रोड तुरुंगात असलेले शिवसेना खासदार संजय राऊत ( sanjay raut ) यांची भेट घेण्यास एक खासदार आणि दोन आमदारांना तुरुंग प्रशासनाने बुधवारी मनाई केली. नियमावलीनुसार कोणालाही कैद्याला भेटण्यास दिले जात नसल्याचे सांगत केवळ रक्ताच्या नात्यातील लोकांना भेटता येते, असे कारण तुरुंग प्रशासनाच्यावतीने देण्यात आले. मात्र, संजय राऊतांना भेटण्यासाठी आलेल्या राजकारण्यांना न्यायालयाचे आदेश किंवा परवानगी मिळाल्यावर भेट होऊ शकते, अशी माहिती तुरुंगातील सूत्रांनी दिली आहे.
जाळीतूनच इतर कैद्यांप्रमाणे भेटता येईल - पत्राचाळ पुनर्विकास घोटाळ्याप्रकरणी न्यायालयाने २२ ऑगस्टपर्यंत न्यायालयीन कोठडी सुनावल्यानंतर संजय राऊत यांना आर्थर रोड तुरुंगात ठेवण्यात आले आहे. बुधवारी सकाळी अकराच्या सुमारास शिवसेनेचे एक खासदार आणि दोन आमदार तसेच त्यांचा भाऊ सुनील राऊत हे संजय राऊत यांना भेटण्यासाठी आर्थर रोड तुरुंगात गेले होते. सर्वांनी मिळून संजय राऊत यांना तुरुंग अधीक्षकांच्या कार्यालयात भेटण्याची परवानगी मागितली. परंतु, अशा प्रकरची भेट देण्यास तुरुंग अधीक्षकांनी नकार दिला होता. संजय राऊत जरी खासदार असले तरी तुरुंगात त्यांना इतर कैदी आणि नियमावलीप्रमाणेच वागणूक दिली जाईल, असे सांगण्यात आले. विशेष भेट हवी असल्यास न्यायालयाची परवानगी आवश्यक असल्याचेही तुरुंग प्रशासनाने सांगितले. सध्यातरी संजय राऊत यांना त्यांच्या रक्ताच्या नात्यातील व्यक्तीला जाळीतूनच इतर कैद्यांप्रमाणे भेटता येईल अशी माहिती सूत्रांनी दिली.
न भेटता परतले सुनील राऊत - संजय राऊत यांच्याशी रक्ताचे नाते असल्याने सुनील राऊत यांना भेट घेण्यास प्रशासनाने परवानगी दिली होती. मात्र, ही भेट इतर कैद्याप्रमाणे भेटण्यासाठी असलेल्या जागेतच म्हणजे जाळीतूनच घेता येईल, असे स्पष्ट करण्यात आले होते. मात्र, सुनील राऊत यांना अधीक्षक कार्यालयात त्यांना भेटायचे असल्याने खासदार आणि आमदार संजय राऊत यांची भेट न घेताच परतले, अशी माहिती तुरुंगातील सूत्रांनी दिली.
हेही वाचा - Jitendra Awhad जितेंद्र आव्हाडांना मोठा झटका, सरकार जाताच मानवाधिकार आयोगाने बजावली नोटीस
