मुंबई - कोरोनाच्या पार्श्वभूमीवर गेल्या वर्षी रेल्वे स्थानकावरील गर्दीवर नियंत्रण मिळवण्यासाठी आणि खबरदारी म्हणून भारतीय रेल्वेकडून रेल्वेच्या प्लॅटफॉर्म तिकिटाचे दर चार पटीने वाढवण्यात आले होते. त्यानंतर लॉकडाऊननंतर प्लॅटफॉर्म तिकीट देणे बंद केले होते. मात्र, आता वयोवृद्ध आणि दिव्यांग प्रवाशांना रेल्वेस्थानकावर सोडण्यासाठी मुंबई उपनगरातील महत्वाच्या ७ रेल्वे स्थानकांवर प्लॅटफॉर्म रेल्वे तिकीट देण्यात येणार आहे. या प्लॅटफॉर्म तिकिटाचे दर १० वरून ५०रुपये करण्यात आले आहे.
या कारणासाठी प्लॅटफॉर्म तिकीट-
प्लॅटफॉर्म तिकिटाचे दर फक्त मध्य रेल्वेच्या प्रमुख ७ रेल्वे स्थानकावर वाढविण्यात आलेले आहे. ज्यामध्ये छत्रपती शिवाजी महाराज टर्मिनस, लोकमान्य टिळक टर्मिनस, ठाणे, कल्याण, पनवेल आणि भिवंडी रोड स्थानकांच्या समावेश आहे. विशेष म्हणजे वयोवृद्ध आणि दिव्यांग प्रवाशांना रेल्वे स्थानकावर सोडण्यासाठी त्यांच्या नातेवाईक रेल्वे स्थानकांवर येत होते. मात्र त्यांना रेल्वे स्थानकात प्रवेश नसल्यामुळे मुंबई मेट्रो पोलिटीयन रिजनमधून गेल्या काही दिवसांपासून प्रवाशांच्या तक्रारी मध्य रेल्वेला प्राप्त झालेल्या होत्या. त्यामुळे या प्रवाशांच्या सोयीसाठी प्लॅटफॉर्म रेल्वे तिकीट सुरु करण्यात आली आहेत, अशी माहिती रेल्वे अधिकाऱ्यांनी दिली आहे.
खबरदारी म्हणून घेतला निर्णय-
मध्य रेल्वेचे मुख्य जनसंपर्क अधिकारी शिवाजी सुतार यांनी दिलेल्या माहितीनुसार, गेल्यावर्षी कोरोनाच्या पार्श्वभूमीवर रेल्वेचे प्लॅटफॉर्म तिकिटांचे दर१० रुपयांवरून ५० रुपये करण्यात आले होते. मात्र त्यानंतर २३ मार्च २०२०पासून संपूर्ण देशात लॉकडाऊन लागू करण्यात आले. त्यामुळे संपूर्ण देशाची रेल्वे प्रवासी वाहतूक ठप्प होती. जून २०२० पासून देशभरात विशेष गाड्या चालवण्यात आलेल्या होत्या. तेव्हा फक्त आरक्षित तिकीट असणाऱ्या प्रवाशांना रेल्वे स्थानकावर प्रवेश देण्यात येत होता. तसेच आता कोरोचा प्रादुर्भाव कमी झालेला नाही. वयोवृद्ध आणि दिव्यांग प्रवाशांच्या सोयीसाठी आणि उन्हाळ्यात रेल्वे स्थानकावर होणारी गर्दी टाळण्यासाठी प्लॅटफॉर्म तिकिटाचे दर ५० रुपये करण्याचा निर्णय घेतलेला आहे. रेल्वेचा हा निर्णय गर्दीवर नियंत्रण मिळवण्यासाठी घेण्यात आलेला आहे.
नवी दर १५ जूनपर्यंत लागू -
यापूर्वी १७ मार्च २०२० मध्ये कोरोना विषाणूचा प्रादुर्भाव रोखण्यासाठी भारतीय रेल्वेकडून प्लॅटफॉर्म तिकिटाचे दर १० रुपये वरून ५० रुपये करण्यात आले होते. आता भारतीय रेल्वेकडून आता सर्व रेल्वे गाड्या हळूहळू सुरू होत आहे. तरीसुद्धा प्लॅटफॉर्म तिकीट देणे बंद केले. मात्र, गर्भवती आणि वयोवृद्ध प्रवाशांच्या गैरसोयी टाळण्यासाठी मध्य रेल्वे मुंबई विभागातील ७ रेल्वे स्थानकावर १५जूनपर्यंत प्लॅटफॉर्म तिकीट देण्याचा निर्णय घेतला आहे.
हेही वाचा - मुंबईत महिनाभरात ४ हजार सक्रिय रुग्णात वाढ, रुग्ण दुप्पटीचा कालावधी 320 दिवसांनी घसरला
