मुंबई : पश्चिम रेल्वे मार्गावरील प्रवाशांचा प्रवास आता जलद होणार आहे. पश्चिम रेल्वे मार्गावर असलेली जुनी सिग्नल यंत्रणा बदलून त्या जागी नवीन संगणाकावर आधारित इलेक्ट्रॉनिक इंटरलाॅकिंग सिस्टम बसविली जात आहे. त्यामुळे एक्स्प्रेसचा वेग ताशी 50 किलोमीटरऐवजी ताशी 100 किलोमीटर होणार आहे.
अत्याधुनिक सिग्नल यंत्रणा
पश्चिम रेल्वेने दिलेल्या माहितीनुसार, आतापर्यंत 40 रेल्वे स्थानकांवर युनिव्हर्सल फेल सेफ ब्लॉक इन्व्हेस्टमेंट संगणकाधारित इलेक्ट्रॉनिक इंटरलॉकिंग सिस्टीम बसविण्यात आलेली आहे. या नव्या यंत्रणेमुळे पश्चिम रेल्वे मार्गावरील एक्स्प्रेसचा वेग वाढण्यास मदत होणार आहे. ज्या स्थानकावर एक्स्प्रेसचा वेग ताशी 50 किमी होता, तिथे आता एक्स्प्रेसचा वेग ताशी 100 किमी होणार आहे. एक्स्प्रेसच्या वेगासह सुरक्षेवरही भर देण्यात आलेला आहे, अशी माहिती पश्चिम रेल्वेचे मुख्य जनसंपर्क अधिकारी सुमित ठाकूर यांनी दिली आहे.
