मुंबई - लसीचा तुटवडा असल्याने मुंबई महापालिकेने ग्लोबल टेंडर मागवले. या टेंडरला पुरवठादारांनी प्रतिसादही दिला. मात्र, लसीच्या पुरवठयासाठी पुढे आलेल्या कंपन्यांना लस बनवणाऱ्या कंपन्यांसोबतचे आपले कायदेशीर व्यवहार सिद्ध करता आलेले नाहीत. यामुळे हे पुरवठादार लसीचा पुरवठा करू शकत नाहीत असे समोर आल्याने पालिका प्रशासनाने ग्लोबल टेंडर रद्द करण्याचा निर्णय घेतला आहे. आता यापुढे पालिका लसीसाठी केंद्राकडे पाठपुरावा करणार आहे. तसेच स्फुटनिक लसीचे भारतातील उत्पादक डॉ. रेड्डीजसोबत चर्चा केली जाणार असल्याची माहिती पालिका प्रशासनाकडून देण्यात आली आहे.
पालिकेचे ग्लोबल टेंडर -
मुंबईमध्ये गेले वर्षभर कोरोनाचा प्रसार आहे. हा प्रसार कमी करण्यासाठी लसीकरण मोहीम सुरू आहे. मुंबईमध्ये दीड कोटी नागरिक राहत असून त्यांचे लसीकरण लवकरात लवकर करता यावे यासाठी पालिकेने राज्य सरकार आणि केंद्र सरकारकडे लसीची मागणी केली. त्यानंतरही लसीचा पुरवठा हवा तसा होत नसल्याने अनेकवेळा लसीकरण ठप्प ठेवावे लागत आहे. मुंबईकरांना लसीकरण करता यावे म्हणून पालिकेने लसीच्या पुरवठयासाठी ग्लोबल टेंडर काढण्याचा निर्णय घेतला. त्यासाठी पुरवठादार कंपन्यांकडून प्रस्ताव मागवण्यात आले. १० पुरवठादार कंपन्यांनी प्रस्ताव पाठवले होते. मात्र, त्यापैकी एका कंपनींने माघार घेतल्याने ९ पुरवठादार राहिले होते. या ९ पुरवठादारांच्या कागदपत्रांची तसेच लस उत्पादक कंपनीसोबत असणाऱ्या त्यांच्या कायदेशीर संबंधांची तपासणी केली जात होती. यासाठी पालिकेचे दोन अतिरिक्त आयुक्त काम करत होते. पुरवठादार आणि लस बनवणाऱ्या कंपन्या यांच्यामधील कायदेशीर बाबी तपासल्या गेल्या. त्यानंतर एकही पुरवठादार कंपनी १ कोटी लसीचा पुरवठा करू शकत नाही हे स्पष्ट झाल्याने पालिका प्रशासनाने ग्लोबल टेंडर रद्द कारण्याचा निर्णय घेतला आहे.
दोन वेळा दिली होती मुदतवाढ -
लसीच्या पुरवठ्यासाठी पालिकेने काढलेल्या ग्लोबल टेंडरला १० पुरवठादार कंपन्यांनी प्रतिसाद दिला. त्यापैकी कोणतेही कारण न देता एका कंपनीने माघार घेतली. राहिलेल्या ९ कंपन्यांनी ७ पुरवठादारांनी स्पुटनिक फाईव्ह या कोविड लसीचा पुरवठा करण्यास स्वारस्य दाखविले होते. त्यापैकी एका पुरवठादाराने स्पुटनिक लाइट या कोविड लसीचा देखील पुरवठा करण्यास स्वारस्य दाखविले होते. मात्र, अन्य एका पुरवठादाराने मान्यता प्राप्त लसींपैकी जी प्राप्त होईल त्या लसीचा पुरवठा करण्यास स्वारस्य दाखविले होते. महानगरपालिका आयुक्त इकबाल सिंह चहल यांच्या मार्गदर्शनाखाली अतिरिक्त महानगरपालिका आयुक्त (प्रकल्प) पी. वेलरासू यांच्या निर्देशानुसार, उप आयुक्त (मध्यवर्ती खरेदी खाते) रमाकांत बिरादार तसेच उप आयुक्त (विशेष) संजोग कबरे व सहकारी अधिकारी कोविड लस पुरवठा उपलब्ध करून घेण्याबाबतची कार्यवाही पार पाडत होते. लस पुरवठ्याबाबतच्या या ग्लोबल टेंडरसाठी १८ मे आणि २५ मे रोजी अशी दोनदा मुदतवाढ दिली होती.
बारकाईने करण्यात आली छाननी -
लस पुरवठा करण्यास इच्छूक असलेले पुरवठादार व प्रत्यक्ष लस उत्पादीत करीत असलेल्या कंपन्या या दोघांमधील असलेले व्यावसायिक संबंध पडताळून पाहण्यात आले. जेणेकरून लस पुरवठा हा दिलेल्या मुदतीत आणि सुरळीतपणे होईल, याची खात्री पटेल व किती दिवसात लस साठा पुरवला जाईल, किती संख्येने लस साठा पुरवला जाईल, लसीचे दर व रक्कम अधिदान करण्याच्या अटी व शर्ती या मुख्य पैलूंचा अतिशय बारकाईने अभ्यास करून महानगरपालिका प्रशासन कोविड प्रतिबंधक लससाठा उपलब्ध करण्याविषयी सतत पाठपुरावा करत होती. सर्व कागदपत्रांची छाननी केल्यावर लस उत्पादक कंपनीचा कायदेशीर पुरवठादार असल्याचे सिद्ध करू न शकल्याने ग्लोबल टेंडर रद्द करण्याचा निर्णय घेण्यात आला आहे.
