मुंबई महापालिकेची २० महिन्यानंतर होणार प्रत्यक्ष सभा, सभेसाठी जागेचा शोध सुरू

मुंबई महापालिकेची १७ मार्च २०२० ला शेवटची प्रत्यक्ष सभा झाली होती. तेव्हापासून गेले पावणे दोन वर्षे ऑनलाइन पध्दतीने सभा होत होत्या. या सभांमध्ये नगरसेवकांना सहभाग घेता येत नव्हता. इंटरनेट नसणे, आवाज न येणे, लॉगिन न होणे, अशा अनेक तक्रारी नगरसेवकांच्या होत्या. अशा अनेक अडचणीमुळे नगरसेवकांना नागरिकांचे प्रश्न मांडता येत नव्हते. अशीच परिस्थिती इतर समितीच्या सभांची होती. यामुळे प्रत्यक्ष सभा घ्याव्यात, अशी मागणी राजकीय पक्षांची होती.

मुंबई - मुंबईत गेले पावणे दोन वर्षे कोरोनाचा प्रादुर्भाव आहे. या पार्श्वभूमीवर मुंबईत अनेक निर्बंध लावण्यात आले आहेत. यामुळे मुंबई महापालिकेच्या (Mumbai Municipal Corporation General Assembly) महासभा ऑनलाइन पद्धतीने सुरू होत्या. कोरोनाचा प्रसार आटोक्यात असल्याने सोमवारी (२२ नोव्हेंबरपासून) म्हणजेच तब्बल २० महिन्यानंतर पालिकेची पहिली सभा प्रत्यक्ष सभा होणार आहे. ही सभा बाबासाहेब पुरंदरे यांच्या मृत्यूमुळे तहकूब होणार असली तरी यानंतर होणाऱ्या सभा प्रत्यक्ष घेण्यासाठी पालिकेने जागांची शोधाशोध सुरू केली आहे.

कोरोनाच्या प्रसारामुळे ऑनलाईन सभा

मुंबईत गेल्या वर्षी मार्च महिन्यात कोरोना विषाणूचा पहिला रुग्ण आढळून आला होता. त्यानंतर रुग्णसंख्या झपाट्याने वाढू लागण्यात लॉकडाऊन लावण्यात आला. गेल्या पावणे दोन वर्षात कोरोनाच्या दोन लाटा येऊन गेल्या. या दोन्ही लाटा थोपण्यात पालिका आणि राज्य सरकारला यश आले आहे. कोरोनाचा प्रसार आटोक्यात असल्याने दुसऱ्या लाटेनंतर अनेक निर्बंध शिथिल करण्यात आले आहेत. यामुळे मुंबईतील सर्व व्यवहार सुरळीत सुरू होत आहेत. मुंबई महापालिकेची १७ मार्च २०२० ला शेवटची प्रत्यक्ष सभा झाली होती. तेव्हापासून गेले पावणे दोन वर्षे ऑनलाइन पध्दतीने सभा होत होत्या. या सभांमध्ये नगरसेवकांना सहभाग घेता येत नव्हता. इंटरनेट नसणे, आवाज न येणे, लॉगिन न होणे, अशा अनेक तक्रारी नगरसेवकांच्या होत्या. अशा अनेक अडचणीमुळे नगरसेवकांना नागरिकांचे प्रश्न मांडता येत नव्हते. अशीच परिस्थिती इतर समितीच्या सभांची होती. यामुळे प्रत्यक्ष सभा घ्याव्यात, अशी मागणी राजकीय पक्षांची होती.

'या' ठिकाणी होऊ शकतात सभा

पालिका सभागृहात २३२ नगरसेवक, आयुक्त, अधिकारी, पत्रकार यांना बसण्याची सोय आहे. कोरोना नियम पाहता पालिका सभागृहात प्रत्यक्ष सभा घेणे शक्य नाही. त्यासाठी सायन माटुंगा येथील किंग्जसर्कल षण्मुखानंद सभागृह, म्युझियम जवळील जुने सचिवालय आदी मोठ्या सभागृहात सभा घ्यावी, अशी मागणी केली जात होती. मात्र पालिकेने मुलुंड येथील कालिदास नाट्यगृह, पार्ले येथील दीनानाथ नाट्यगृह आणि अण्णाभाऊ साठे महामंडळाचे सभागृह या ३ जागेचे पर्याय पालिकेसमोर आहेत. महापौर किशोरी पेडणेकर या विलेपार्ले येथील दीनानाथ नाट्यगृहात सभा घेण्यास अनुकूल असल्याचे समजते. ज्या जागेत सभागृह आयोजित केले जाईल, त्याठिकाणी २२७ व ५ नामनिर्देशित नगरसेवक असे २३२ नगरसेवक, पालिका चिटणीस विभागाचे अधिकारी, पालिका आयुक्त किंवा अतिरिक्त आयुक्त, इतर महत्वाच्या विभागाचे अधिकारी आदींना सुरक्षित अंतर सोडून बसण्याची व्यवस्था पालिकेला करावी लागणार आहे.

भाजपाचे आंदोलन ते कोर्टात धाव

कोरोनाचा प्रसार कमी झाल्याने स्थायी समितीच्या बैठकांमध्ये सदस्यांना बसू द्यावे, यासाठी भाजपाने आंदोलन केले. उच्च न्यायालयानेही ज्यांना बैठकीला बसायचे आहे, त्यांना बसू द्या असे आदेश दिले. मात्र राज्य सरकारचे आदेश पुढे करत भाजपा सदस्यांना बैठकीला बसण्यास नकार देण्यात आला. पालिका सभागृहाच्या सभा प्रत्यक्ष घ्या, अशी मागणी करण्यासाठी भाजपाने महापौर कार्यालयाबाहेर आंदोलन केले होते. त्यानंतर आता प्रत्यक्ष सभा घ्याव्यात यासाठी भाजपाचे गटनेते प्रभाकर शिंदे यांनी पत्र दिले आहे.

हेही वाचा - Grampanchayat Bypolls : ग्रामपंचायतींमधील 7 हजार रिक्तपदांसाठी 21 डिसेंबरला पोटनिवडणूक