मुंबई - मुंबई महापालिकेची निवडणूक जवळ आल्याने मुंबईकरांना खुश करण्यासाठी विकासांच्या कामांचा धडाका सुरु झाला आहे. नुकतेची १७०० कोटींची रस्त्यांच्या कामांना मंजुरी देण्यात आली आहे. त्यानंतर आता पूर्व आणि पश्चिम उपनगरातील जुनी मैदाने आणि उद्यानांचा चेहरा मोहरा बदलला जाणार आहे. पाच उद्याने आणि मैदानांना थीम पार्कचा नवा लूक दिला जाणार आहे. पालिकेने यासाठी निविदा मागवल्या असून त्यावर २५ कोटी ६५ लाख रुपये खर्च केला जाणार आहे.
- उद्यान, मैदाने थीम पार्क होणार!
मागील दोन वर्षापासून कोरोना विरोधात लढा सुरु आहे. कोरोनाच्या प्रतिबंधासाठी मुंबई महापालिकेला मोठा आर्थिक फटका बसला आहे. पालिकेचे आतापर्यंत सुमारे अडीच हजार कोटींहून अधिक खर्च झाले आहेत. पालिकेने त्यामुळे काही विकासकामांना कात्री लावली आहे. यात उद्याने आणि मैदानांचे सुशोभीकरणाच्या कामांचाही समावेश होता. प्रशासनाने पुन्हा मोठ्या प्रमाणात विकासकामे हाती घेतली आहेत. यात मुंबईतील मैदाने, उद्याने, पार्क यावर पालिकेने अधिक लक्ष वेधले आहे. दादर, वरळी, अंधेरी, बोरीवली, भायखळा, सायन, कांदिवली परिसरातील उद्यानांची डागडुजीची कामे सुरु केल्यानंतर आता प्रबोधनकार ठाकरे उद्यान, विक्रोळी पश्चिम, पंकेशा मनोरंजन मैदान, घाटकोपर पश्चिम, राजे शिवाजी मैदान, चारकोप, दहिसर गावठाण या उद्यान आणि मैदाने थीम पार्क म्हणून विकसित होणार आहेत. पालिकेच्या नियोजन विभागाने या कामांचे नियोजन केले आहे. मुंबईतील विविध भागातील उद्याने, मैदाने आणि तसेच परिसरातील पदपथ दुरूस्ती यावर भर देण्यात आला आहे. यासाठी जिल्हा नियोजन समितीने विशेष निधीचीही तरतूद केली असल्याचे प्रशासनाने स्पष्ट केले आहे.
- 'या' उद्यानांचे काम केले जाणार
प्रबोधनकार ठाकरे उद्यान, विक्रोळी पश्चिम
थीम : मेडिटेशन पार्क
क्षेत्रफळ : २८,४८७ चौरस मीटर
योगा आणि ध्यानधारणा विभाग
चालण्यासाठी पाथ वे
विविध खेळ साहित्यासह मुलांचा विभाग
हिरवळीसह व्यायामाची साहित्य
शाळेच्या मुलांसाठी खेळाचे मैदान
रॉक क्लायबिंग झोन
- पंकेशा मनोरंजन मैदान, घाटकोपर पश्चिम
थीम : सायन्स पार्क
क्षेत्रफळ : १९,१३५ चौरस मीटर
मेट्रोला हस्तांतरण ५६०० चौरस मीटर
शारिरीक शास्त्र व विज्ञान खेळाची साहित्य
मुलांसाठी स्वतंत्र खेळ विभाग
अॅम्फीथिएटर, गझिबो आसनव्यवस्था
लॅण्डस्केपिंग आणि खतनिर्मिती प्रकल्प
मनोरंजन साधने आणि व्यायामाची साहित्य
- राजे शिवाजी मैदान, कांदिवली चारकोप सेक्टर १
थीम : ट्रॅफिक पार्क
क्षेत्रफळ : ८००० चौरस मीटर
५० वाहतूक चिन्हे, १० सिग्नल, १ पादचारी पूल
खुले खेळाचे मैदान, प्राण्यांसाठी जागा
खुली व्यायामशाळा, लहान मुलांचा विभाग
बॅडमिंटन, चालण्यासाठी ट्रॅक, अॅम्फीथिएटर
शाळेच्या बससाठी पार्किंग, बसण्यासाठी आसने
आकर्षक झाडे, हिरवळ, मोकळ्या जागेचा वापर
- दहिसर गावठाण उद्यान, दहिसर पश्चिम
थीम : स्पोर्टस् पार्क
क्षेत्रफळ : ४९७५ चौरस मीटर
उद्यानाचे विविध विभाग करून वैविध्यपूर्ण वापर
विविध प्रकारच्या खेळांसाठी नियोजन
होळी उत्सव साजरे करण्याचे ठिकाण
खुली व्यायामशाळा, मुलांसाठी खेळण्याची साहित्य
हॉलीबॉल, क्रिकेट, कबड्डी कोर्ट
स्लाईड्स, स्विंग्स, सी सॉ आणि मेरी गो राउंड
नवीन पाथ वे, स्टेप्ड लँडस्केप आसने, लहान मुलांसाठी विभाग
हेही वाचा - Sharad Pawar : शरद पवार यांची पिंपरी मेट्रोतून सफर
