मुंबई - मुंबईचे बडतर्फ पोलीस अधिकारी सचिन वाझेला(Sachin Waze) न्यायालयाने खंडणीच्या प्रकरणात(Extortion Case) आता 15 नोव्हेंबरपर्यंत पोलीस कोठडी(Police Custody) सुनावली आहे. आज सचिन वाझेची पोलीस कोठडी संपली असून, त्याला न्यायालयात हजर करण्यात आले होते. यावेळी पुन्हा दोन दिवसांची पोलीस कोठडी वाझेला देण्यात आली आहे.
गोरेगावमधील एका वसुली प्रकरणात सचिन वाझेला मुंबई गुन्हे अन्वेषण विभागाने ताब्यात घेतले होते. वाझेचा ताबा मिळाल्यानंतर पोलिसांनी त्याला न्यायालयात हजर केले होते. त्यावेळी त्याला 6 नोव्हेंबरपर्यंत कोठडी सुनावण्यात आली होती. पुन्हा न्यायालयात हजर करण्यात आलं असता, त्याच्या कोठडीत 13 नोव्हेंबरपर्यंत वाढ करण्यात आली होती. आज पुन्हा 15 नोव्हेंबरपर्यंत पोलीस कोठडीत वाढ करण्यात आली आहे.
- आरोप काय?
गोरेगावमधील विमल अग्रवाल नावाच्या व्यापाऱ्याने सचिन वाझे, परमबीर सिंग, सुमित सिंह, अल्पेश पटेल, विनय सिंह आणि रियाज पटेल यांच्याविरोधात तक्रार दाखल केली होती. माझं पार्टनरशिपमध्ये गोरेगाव येथे BOHO रेस्टॉरंट आणि बार आहे. अंधेरीमध्ये BCB स्टोअर आणि बार आहे. हे दोन्ही चालू ठेवण्यासाठी सचिन वाझे आणि अन्य आरोपींनी 9 लाख रुपये घेतले होते. आरोपींनी जानेवारी- फेब्रुवारी 2020 पासून ते मार्च 2021 या काळात 9 लाखांची वसूली केली आहे, असा आरोप अग्रवाल यांनी तक्रारीत केला होता. अग्रवाल यांच्या आरोपानंतर मुंबई पोलिसांनी याप्रकरणी भारतीय दंड संहिता नुसार 384 ,385 आणि 34 अंतर्गत गुन्हा दाखल केला आहे.
- कोण आहे सचिन वाझे?
सचिन वाझे एन्काऊंटर स्पेशालिस्ट म्हणून ओळखला जातो. वाझे जवळपास 16 वर्षांनंतर 2020 मध्ये पोलीस दलात परतला. वाझे हा 1990 च्या बॅचचा अधिकारी आहे. त्याने 60 हून अधिक एन्काऊंटर केले आहेत. प्रदीप शर्मा अंधेरी सीआययूचे प्रमुख असताना त्यांच्या नेतृत्वात वाझे याने काम केले आहे.
घाटकोपर बस बॉम्बस्फोटाचा आरोपी ख्वाजा युनूसचा पोलीस कोठडीत मृत्यू झाल्या प्रकरणी काही पोलिसांवर हत्या आणि पुरावे नष्ट केल्याचा आरोप होता. वाझेही या आरोपींपैकी एक होता. त्या प्रकरणात वाझेला 2004 मध्ये निलंबितही करण्यात आले होते. 2007 मध्ये वाझेने राजीनामा दिला, मात्र तपास सुरु असल्याने तो मंजूर करण्यात आला नव्हता. त्यानंतर 2008 च्या दसरा मेळाव्यात वाझे शिवसेनेत दाखल झाला. सायबर क्राइम आणि बनावट नोटांशी संबंधित अनेक मोठी प्रकरणेही वाझेने हाताळली आहेत. सॉफ्टवेअर डेवलपर म्हणूनही त्याने काम केलं. वाझेनी एक अ‍ॅपही तयार केले होते. ते एका एनजीओ संबंधित कामही करायचे. गरजू लोकांना कायदेशीर मदत देणे हे या स्वयंसेवी संस्थेचे काम होते.
- हिरेन प्रकरणाचाही आरोपी-
उद्योगपती मुकेश अंबानी यांच्या निवासस्थानाबाहेर स्फोटकांची गाडी ठेवण्यात आली होती. ही गाडी वाझेने ठेवल्याचा आरोप आहे. या गाडीचा मालक मनसुख हिरेन यांची हत्या झाली होती. या हत्येचा आरोपही वाझेवर आहे. त्यामुळे त्याची चौकशी करण्यासाठी एनआयएकडून वाझेचा ताबा मिळवण्यासाठी पोलिसांनी विशेष एनआयए न्यायालयात याचिका दाखल केली होती. त्यानंतर वाझेचा ताबा पोलिसांना देण्यात आला.
