मुंबई - म्हाडाच्या कोकण आणि मुंबई मंडळांच्या 274 दुकानांचा 'ई' लिलाव होणार आहे. म्हाडा लिलावासाठी पहिल्यांदाच डिजिटल व्यासपीठाचा वापर करणार आहे. तब्बल 9 वर्षांपासून या दुकानांचा लिलाव रखडलेला होता.
म्हाडाकडून उपलब्ध केल्या जाणाऱ्या दुकानांसाठी स्वतंत्रपणे सोडत जाहीर होते. त्यातील जाहिरातीनुसार नोंदणी, ऑनलाईन अर्ज दाखल करणे, कागदपत्रे डाउनलोड करण्यासारख्या तांत्रिक गोष्टींसाठी 27 मे पर्यंतची अंतिम मुदत आहे.
म्हाडाने 2010 मध्ये 168 दुकानांच्या विक्रीची जाहिरात दिली होती. त्यानंतर तब्बल 9 वर्षाचा कालावधी लागला. या ऑनलाईन सोडतीत जादा बोलीनुसार दुकानांचा ताबा देण्यात येणार आहे.
म्हाडा नियमानुसार अर्जदारास जाहिरातीतील दुकानांच्या किंमतीच्या एक टक्का रक्कम अनामत रक्कम म्हणून अर्जदारास भरावी लागणार आहे. आतापर्यंत 2500 पेक्षा जास्त जणांनी अर्ज भरला असून 700 पेक्षा जास्त जणांनी अनामत रक्कम जमा केली आहे.
या ई-लिलावात सायन-प्रतीक्षानगर येथे 35 दुकाने, मालाड-मालवणी येथे 69, गव्हाणपाडा-मुलुंड, विनोबा भावेनगर कुर्ला, गोरेगाव येथे दुकाने आहेत. कोकण मंडळाची विरार-बोळींज, वेंगुर्ले येथे दुकाने आहेत. विजेत्यांनी पालिकेच्या आरक्षणाप्रमाणेच दुकानांच्या वापर करणे अपेक्षित आहे.
