मुंबई - सोमवारी दुपारी महानिर्मितीच्या राज्यभरातील विविध वीज केंद्रांमधून रेकॉर्ड ब्रेक १० हजार ३४ मेगावॅट वीज उत्पादन घेण्यात आले. महानिर्मितीच्या इतिहासातील ही पहिलीच घटना असल्याचा दावा महाजेनकोने केला आहे.
औष्णिक विद्युत केंद्राचे वीज उत्पादन 7577 मेगावॅट, यात नाशिक 561 मेगावॅट, कोराडी 1500 मेगावॅट, खापरखेडा 951 मेगावॅट, पारस 450 मेगावॅट, चंद्रपूर 2550 मेगावॅट, भुसावळ 967 मेगावॅट तर उरण वायू विद्युत केंद्र 270 मेगावॅट, सौर ऊर्जा 119 मेगावॅट व जलविद्युत केंद्रांपासून 2100 मेगावॅट वीज उत्पादन घेण्यात आले.
राज्यात सर्वदूर कडक उन्हाळा असून विजेची एकूण मागणी 22300 मेगावॅट इतकी पोहोचली आहे. राज्याचे वीज उत्पादन 17337 मेगावॅट (खासगी वीज उत्पादनासह) इतके आहे. सुमारे 5357 मेगावॅट वीज केंद्राच्या वाट्यातून घेण्यात येत आहे.
महानिर्मितीचे अध्यक्ष तथा व्यवस्थापकीय संचालक अरविंद सिंग यांच्या मार्गदर्शनाखाली तसेच संचालक (संचलन) चंद्रकांत थोटवे यांच्या नेतृत्वाखाली कार्यकारी संचालक व महानिर्मितीच्या औष्णिक, वायू, सौर व जलविद्युत केंद्रातील मुख्य अभियंते, अधिकारी, विभाग प्रमुख, अभियंते, तंत्रज्ञ, कर्मचारी यांच्या प्रयत्नांची ही फलश्रुती असल्याचे संचालक चंद्रकांत थोटवे यांनी सांगितले. याबाबत त्यांनी सगळ्या अधिकारी, कर्मचाऱ्यांचे अभिनंदनही केले आहे.
