'पाच कोटी लसींसाठी काढलेल्या ग्लोबल टेंडरला विदेशी कंपन्यांचा अद्याप प्रतिसाद नाही'

राज्य सरकारने काढलेल्या ग्लोबल टेंडरला अद्याप विदेशी कंपन्यांचा प्रतिसाद मिळालेला नाही. त्यामुळे ग्लोबल टेंडरची तारीख 25 मे पर्यंत वाढवण्यात आली आहे. केंद्र सरकारने अजून राज्य सरकारला परवानगी दिली नसल्याने विदेशी कंपन्याचा प्रतिसाद मिळत नसल्याची आरोग्यमंत्र्यांनी शंका उपस्थित केली आहे.

मुंबई - राज्य सरकारने काढलेल्या ग्लोबल टेंडरला अद्याप विदेशी कंपन्यांचा प्रतिसाद मिळालेला नाही. त्यामुळे ग्लोबल टेंडरची तारीख 25 मे पर्यंत वाढवण्यात आली आहे. केंद्र सरकारने अजून राज्य सरकारला परवानगी दिली नसल्याने विदेशी कंपन्याचा प्रतिसाद मिळत नसल्याची आरोग्यमंत्री राजेश टोपे यांनी शंका उपस्थित केली आहे.

राज्यात झपाट्याने लसीकरण व्हावे, म्हणून राज्य सरकारकडून ग्लोबल टेंडर काढण्यात आली आहेत. हे टेंडर पाच कोटी लसींसाठी काढण्यात आली असली तरी, अद्याप या ग्लोबल टेंडरला कोणत्याही विदेशी कंपनीने प्रतिसाद दिला नसल्याचे आरोग्य मंत्री राजेश टोपे यांच्याकडून सांगण्यात आले आहे. त्यामुळे ग्लोबल टेंडरची तारीख वाढवून 25 मे पर्यंत करण्यात आली असल्याचे यावेळी राजेश टोपे यांनी सांगितले. ग्लोबल टेंडरसाठी अजूनही केंद्र सरकारच्या काही परवानग्या शिल्लक आहेत. त्या परवानग्या मिळत नसल्याने विदेशी कंपन्या ग्लोबल टेंडरला प्रतिसाद देत नसल्याची शंका आरोग्य मंत्र्यांकडून उपस्थित केली गेली. मात्र लवकरच या ग्लोबल टेंडरला प्रतिसाद मिळून राज्यासाठी पाच कोटी लस उपलब्ध होतील अशी आशाही त्यांनी व्यक्त केली आहे.

पाच लाख लस दुसऱ्या डोससाठी राखीव -

राज्यात सध्या कोविशिल्डच्या तीन लाख तर को-व्हॅक्सिनच्या दोन लाख अशा पाच लाख लस उपलब्ध आहेत. या सर्व लस ज्यांचा दुसरा डोस घेण्याचे बाकी आहे, त्यांच्यासाठी दिले जाणार असल्याचेही राजेश टोपे यांच्याकडून स्पष्ट करण्यात आले.

कोरोनाची आकडेवारी समाधानकारक -

राज्याचा कोरोना रुग्ण बरा होण्याचा रिकव्हरी रेट 90 टक्केच्या वर गेल्याने आरोग्यमंत्र्यांनी समाधान व्यक्त केले. कोरोनाचा प्रादुर्भाव वाढत असताना हा रेट 80 टक्केच्या खाली गेला होता. तसेच राज्यात सध्या मृत्यूदर केवळ 0.5% इतका असल्याचेही राजेश टोपे यांनी सांगितले. तसेच राज्यात दोन कोटी 31 लाख लोकांचे लसीकरण झाले असून देशात लसीकरणाच्या बाबतीत महाराष्ट्र राज्य प्रथम क्रमांकावर असल्याने राजेश टोपे यांनी समाधान व्यक्त केले.