मुंबई - पवई आयआयटी मार्केट जंक्शन समोर असणाऱ्या एका हॉटेलला भीषण आग लागल्याची घटना आज सकाळी सातच्या दरम्यान घडली आहे. यामध्ये हॉटेल पूर्णपणे जळून भस्मसात झाले आहे. संबंधित घटनेची माहिती मिळताच अग्निशमन दलाच्या दोन गाड्या घटनास्थळी दाखल झाले असून आगीवर नियंत्रण मिळवले आहे.
पवईत हॉटेलला भीषण आग; मालमत्ता जळून खाक
पंजाब तडका हॉटेल हे आयआयटी मार्केट जंक्शन जवळच आहे. दरम्यान, सकाळी हे हॉटेल बंद होते. आतून आगीचे लोळ बाहेर पडत असताना रहिवाश्यांमध्ये गोंधळ उडाला होता. काही वेळातच या आगीने रौद्ररुप धारण केले. यामुळे संपूर्ण जागेला आगीने वेढले आणि या दुर्घटनेत दुकान जळून खाक झाले आहे. या घटनेत कोणत्याही प्रकारची जीवितहानी झाली नसली तरीही मालमत्तेचे नुकसान झाले आहे. ही आग शॉर्ट सर्किटमुळे लागल्याचा अंदाज व्यक्त होत आहे.
