मुंबई - चांदिवलीतील चित्रीकरण स्टुडिओला आग लागली असून अग्निशमन दलाच्या ४ गाड्या घटना स्थळी दाखल झाल्या. तसेच आगीवर नियंत्रण मिळवण्यात यश आल्याचे अग्निशमन अधिकाऱ्याने सांगितले.
चांदिवलीच्या बालाजी स्टुडिओला आग लागल्याची घटना आज दुपारी ३.३० वाजता घडली असून यामध्ये कोणतीही जीवितहानी झाली नाही. मात्र सेट जळून खाक झाल्याची प्राथमिक माहिती आहे. 'कुंमकुम भाग्य'या मालिकेचे शूटिंग सुरू असल्याची माहिती मिळत आहे. अचानक आग लागल्याने कलाकार आणि कर्मचाऱ्यांची धावपळ झाली.
पवईतील चांदिवलीत एक बालाजी स्टुडिओ असून लॉकडाऊन काळात तो बंद होता. मात्र, आता लॉकडाऊन शिथिल केल्यानंतर याठिकाणी शुटिंगला सुरुवात झालीय. बालाजी स्टुडिओच्या पहिल्या मजल्यावर ही आग लागली. या ठिकाणच्या एसीमधून आगीचे लोळ निघत होते.
दरम्यान, अग्निशमन दलाला पाचारण करण्यात आले असून या घटनेत कोणीही जखमी न झाल्याचे परिमंडळ-१० चे सहाय्यक आयुक्त मिलिंद खेतले यांनी सांगितले.
