कोरोना लस निर्माण होणाऱ्या ठिकाणी आगीचा प्रादुर्भाव नाही, मंत्र्यांची माहिती

पुण्याच्या सिरम इन्स्टिट्यूटला आग लागली आहे. त्यामुळे प्रशासनाची धावपळ उडाली आहे. पुण्यातील मांजरी परिसरात सीरम इन्स्टिट्यूटची नवीन इमारत आहे.

मुंबई - पुण्याच्या सिरम इन्स्टिट्यूटला आग लागली आहे. त्यामुळे प्रशासनाची धावपळ उडाली आहे. मुख्यमंत्री, उपमुख्यमंत्री आणि अन्न व औषध प्रशासन मंत्री या आगीची माहीती घेत आहेत. पुण्यातील मांजरी परिसरात सीरम इन्स्टिट्यूटची नवीन इमारत आहे. कोव्हिशील्ड या लशीची निर्मिती या इन्स्टिट्यूटमध्ये करण्यात येते. गुरुवारी (21 जानेवारी) दुपारी एक वाजता इमारतीच्या दुसऱ्या मजल्यावर आग लागली. त्यानंतर परिसरात धुराचे मोठे लोट पसरले होते. अग्निशमन दलाच्या दहा गाड्या घटनास्थळी दाखल झाल्या असून आगीवर नियंत्रण मिळवण्याचे प्रयत्न सुरु आहेत. आगीचं नेमकं कारण अद्याप अस्पष्ट आहे.

सिरम इन्स्टिट्यूटला लागलेली आग विझवणे आणि हानी टाळण्यासाठी प्राधान्य - उपमुख्यमंत्री

दरम्यान ही आग विझवण्याचे प्रयत्न युद्धपातळीवर सुरु सुरू आहे. शहर आणि जिल्हा प्रशासनाच्या सर्व संबंधित यंत्रणा आग विझविण्याचा आणि मदत कार्यात झाल्या आहेत. पुणे आयुक्तांकडून मी यासंदर्भातली माहिती घेतली असून दुर्घटनेच्या सखोल चौकशीचे निर्देश देण्यात आले आहेत. या प्रकल्पाच्या सुरक्षिततेच्या संदर्भात देशातून आणि देशाबाहेरही चिंता व्यक्त करण्यात येत आहे. यासंदर्भात मी स्पष्ट करू इच्छितो की, कोरोना प्रतिबंधक लसनिर्मितीचा प्रकल्प सुरक्षित असल्याचे मला सांगण्यात आले आहे. सद्यस्थितीत आग विझवणे आणि दुर्घटनेमुळे होणारी हानी नियंत्रित ठेवणे यास सध्या प्राधान्य देण्यात येत आहे, असे उपमुख्यमंत्री अजित पवार यांनी सांगितले.

तातडीने आग नियंत्रणात आणण्याच्या मुख्यमंत्र्यांच्या सूचना-

मुख्यमंत्री उद्धव ठाकरे यांनी पुणे महानगरपालिका आयुक्तांना तातडीने आग नियंत्रणात आणण्याच्या सूचना दिल्या. राज्याच्या यंत्रणेला देखील निर्देश दिले असून आता परिस्थिती नियंत्रणात आहे. आग संपूर्णपणे विझवण्यासाठी सर्व सहकार्य करण्यात येत आहे. "मुख्यमंत्री कार्यालय सगळ्या घटनेची माहिती घेत आहे. तसेच पुणे महानगरपालिका आणि इतर उपाययोजना करणाऱ्या संस्थांच्या संपर्कात आहोत, सिरम'ची आग आटोक्यात आणण्यासाठी शर्थीचे प्रयत्न सुरू आहेत",असे ट्विट मुख्यमंत्री उद्धव ठाकरे यांनी केले आहे.

यावर अन्न व औषध प्रशासन मंत्री डॉ. राजेंद्र शिंगणे यांनी देखील प्रतिक्रया दिली आहे. कोरोना लस बनत असलेल्या ठीकाणी या आगीचा प्रादुर्भाव झाला नाही. मात्र बिसीजी लसीचे निर्माण होत असलेल्या ठीकाणी ही आग लागली, अशी माहिती शिंगणे यांनी दिली.

अग्निशमन दलाच्या 10 गाड्या घटनास्थळी दाखल

घटनास्थळी अग्निशमन दलाच्या 10 गाड्या दाखल झाल्या असून, आगीवर नियंत्रण मिळवण्याचे काम सध्या सुरू आहे. जिथे कोरोनाची लस बनवण्याचं काम होत आहे, ती जागा सुरक्षित आहे. या जागेच्या विरुद्ध बाजूला जे गेट आहे, तिथे ही आग लागल्याचं सांगण्यात येत आहे. त्यामुळे कोव्हिशिल्ड लसीला कोणताही धोका नाही. कोव्हिशिल्ड लसीचं काम हे गेट नंबर तीन, चार आणि पाच या परिसरात केले जाते. हा भाग अत्यंत सुरक्षित आहे.

हेही वाचा- 'कोरोनावरील लस सुरक्षितच, संकोच बागळू नका'