मुंबई - कोरोनाच्या पार्श्वभूमीवर देशात लॉकडाऊन लागू करण्यात आले आहे. राज्यातही संचारबंदी आणि जमावबंदीचे काटेकोरपणे पालन होत आहे. असे असतानाही बेकायदा मद्य वाहतूक व विक्री सुरूच असल्याचे राज्य उत्पादन शुल्क विभागाच्या विभागीय भरारी पथकांनी केलेल्या कारवाईतून समोर आले आहे. कोरोनाचा प्रादुर्भाव आटोक्यात आणण्यासाठी लॉकडाऊन असल्याने, या काळात मद्यसाठा वाहतूक आणि विक्रीस मनाई आहे. मात्र, तळीरामांची मागणी वाढली आहे. त्यासाठी ते वाटेल ती किंमत द्यायला तयार होत आहेत. त्यामुळेच मद्यविक्रेत्यांनी दारूचा बेकायदा पुरवठा करण्यास पुढाकार घेतला आहे.
हेही वाचा... Global Covid-19 Tracker : जगभरात कोरोनामुळे 82 हजारहून अधिक नागरिकांचा मृत्यू
एकीकडे महाराष्ट्राबाहेरील काही राज्यांमध्ये दारूबंदीमुळे समुपदेशन केंद्र अथवा दारू सोडण्यासाठीचे उपक्रम राबवले जात असताना राज्यात मात्र, तळीरामांच्या वाढत्या मागणीचा पुरवठा करण्यासाठी अनेक दारू तस्कर पुढे सरसावले आहे. त्यामुळेच राज्य उत्पादन शुल्क विभागाच्या अनेक भरारी पथकांकडून सातत्याने अवैध दारूसाठे आणि विक्रीच्या ठिकाणी धाडी टाकण्यात येत आहे. मंगळवारच्याच एका अहवालानुसार, 'संपूर्ण भारतात संचारबंदी असताना महाराष्ट्रात मंगळवारी 38 लाखांहून अधिक किमतीची दारू जप्त केली आहे. तसेच महाराष्ट्र राज्य उत्पादन शुल्क विभागाने मंगळवारी एकाच दिवशी 155 गुन्हे दाखल केले असून 155 जणांना अटक केली आहे'. एकंदरीत महाराष्ट्रात लॉकडाऊनच्या काळात दारूचा काळाबाजार वाढला असून दारू तस्करांना अच्छे दिन येत असल्याचे दिसत आहे.
-
Maharashtra State Excise Department has registered 152 cases, arrested 55 people and seized liquor worth over Rs 38 lakhs in last 24 hours, amid #CoronavirusLockdown.
— ANI (@ANI) April 7, 2020 " class="align-text-top noRightClick twitterSection" data="
">Maharashtra State Excise Department has registered 152 cases, arrested 55 people and seized liquor worth over Rs 38 lakhs in last 24 hours, amid #CoronavirusLockdown.
— ANI (@ANI) April 7, 2020Maharashtra State Excise Department has registered 152 cases, arrested 55 people and seized liquor worth over Rs 38 lakhs in last 24 hours, amid #CoronavirusLockdown.
— ANI (@ANI) April 7, 2020
हेही वाचा... 'मुस्लिमांना बळीचा बकरा बनवणे हे कोरोनावरील औषध नाही'
राज्यात दारुसाठी काय पण ?
महाराष्ट्रात एकट्या चंद्रपूर जिल्ह्यात दारूबंदी आहे. मात्र, तिथे दारूबंदी फसल्याचे दिसत आहे. राज्याला 17 हजार कोटींचा महसूल फक्त दारूतून मिळतो. त्यामुळे संपुर्ण महाराष्ट्रात दारूबंदी करावी की नाही, हा नेहमीच वादाचा मुद्दा राहिला आहे. मात्र, सध्या लॉकडाऊन असल्याने अनायसे संपुर्ण राज्यात एकप्रकारे दारुबंदी असल्याचे चित्र आहे. परंतु ज्याप्रमाणे चंद्रपूरात दारुबंदीमुळे दारू माफिया निर्माण झाले, तसेच सध्या राज्यभर दारू माफिया आणि दारू तस्करांची संख्या वाढताना दिसत आहे. मागील काही दिवसांच्या घटनांवरुन आपल्याला राज्यातील परिस्थितीचा अंदाज येऊ शकतो.
लॉकडाऊनमध्ये दारू तेजीत; राज्य उत्पादन शुल्क विभागाच्या कारवाईत साडेआठ लाखाची दारू जप्त
अहमदनगर - लॉकडाऊनमुळे दारू विक्रीला पूर्णपणे बंदी आहे. मात्र, काही ठिकाणी व्याकुळ झालेल्या मद्य शौकिनाची चोरी-छुप्या पद्धतीने देखभाल करत असल्याच्या घटना समोर येत आहेत. अहमदगरमध्ये राज्य उत्पादन शुल्क विभागाने साडे आठ लाख रुपयांचा मद्यसाठा जप्त केला आहे.
अवैध गावठी दारू अड्ड्यावर छापा; बारामती पोलिसांची कारवाई
पुणे - कोरोना संचारबंदीत सर्व दुकाने बंद असल्याने तळीरामांची मोठी अडचण झाली आहे. मात्र, कोणत्या ना कोणत्या मार्गाने दारू विक्री होत असल्याचा प्रकार अनेक ठिकाणी पहायला मिळत आहे. बारामती तालुक्यातील गुणवडी येथे सुरू असणाऱ्या अवैध गावठी दारू अड्ड्यावर पोलिसांनी कारवाई केली. या कारवाईत बारामती शहर पोलिसांनी तीन लाखापेक्षा अधिक रकमेची दारू नष्ट केली.
पिंपरी-चिंचवडमध्ये कोरोनाने थैमान घातले तरी तळीरामांचे दारू पिणे चालूच..
पुणे - सध्या कोरोना विषाणूमुळे अवघा भारत लॉकडाऊन करण्यात आला आहे. अत्यावश्यक सेवा वगळून सर्व बंद ठेवण्यात आले आहे. त्यामुळे भाजीचे मार्केट सुरूच आहेत. रस्त्यावर प्रत्येक ठिकाणी पोलीस बंदोबस्त आहे. अशात काही तळीराम भाजीच्या नावाखाली गावठी दारू दुचाकीवरून घेऊन जात असताना पिंपरी वाहतूक पोलिसांना आढळले. मग काय दिला पोलिसांनी चोप. एवढेच नव्हे तर त्याच्या तोंडाला मास्क नसल्याने त्याचा शर्ट काढून तोंडालाही बांधायला लावला.
दारू तस्करांच्या कारचा पाठलाग करत पोलिसांनी साठा केला जप्त; दोघांना अटक
चंद्रपूर - लॉकडाऊनमध्ये कोरडा पडलेला गळा ओला करण्यासाठी तळीराम वाटेल ती किंमत मोजत आहेत. अशा तळीरामांना दारू पुरविण्यासाठी दारूतस्कर पुढे सरसावले आहेत. त्यामुळेच लॉकडाऊनदरम्यान पोलीस आणि दारू तस्कर यांच्यात कारवाई दरम्यान काही वेळा पकडा-पकडी सुरू असल्याचे दिसत आहे. मंगळवारी अशाच प्रकारे यवतमाळ जिल्ह्याची सीमा पार करणाऱ्या दारू तस्करांच्या कारचा पाठलाग करुन गडचांदूर पोलिसांनी 7 लाख 30 हजारांची दारू जप्त केली.
अजब...दुधाच्या किटलीतून दारू तस्करी; तळीरामांसाठी दारू विक्रेत्यांची शक्कल
सांगली - कोरोना विषाणूचा वाढता प्रादुर्भाव रोखण्यासाठी देशात लॉकडाऊन करण्यात आले आहे. संचारबंदीत सर्व दुकाने बंद असल्याने तळीरामांची मोठी अडचण झाली आहे. मात्र, कोणत्या ना कोणत्या मार्गाने दारू विक्री होत असल्याचा प्रकार अनेक ठिकाणी पहायला मिळत आहे. सांगलीच्या आटपाडीतील खरसुंडीमध्ये तर चक्क दुधाच्या किटलीमधून दारूच्या बाटल्या तस्करीचा प्रकार समोर आला आहे.
कराड उत्पादन शुल्क विभागाचे छापे; साडे तीन लाखांच्या मद्यासह १० जणांना अटक
लॉकडाऊन काळात कराडच्या उत्पादन शुल्क विभागाने वेगवेगळ्या ठिकाणी छापे मारले. त्यात ३ लाख ५५ हजार ९८६ रूपये किंमतीचे देशी-विदेशी मद्य आणि ६ मोटरसायकली जप्त केल्या आहेत. तसेच एकूण १० जणांना अटक करण्यात आली आहे.
बार, वाईन शॉप फोडले
एकंदरीत राज्यात लॉकडाऊन असतानाही, लोकांचे दारू पिण्याचे प्रमाण काही कमी होताना दिसत नाही. किंबहुना तळीराम आपला घसा ओला करण्यासाठी हवे ते करायला तयार होत आहे. यामुळेच दारूचा पुरवठा करणाऱ्याचे फावले आहे. काही ठिकाणी दारूचा काळाबाजार मोठ्या प्रमाणावर होताना दिसत आहे. हजार किंमतीची दारू देखील दुप्पट अथवा तिप्पट किंमतीत विकताना आढळून येत आहे. याही पेक्षा भयानक म्हणजे राज्यात लॉकडाऊनच्या काळात हातभट्टीची दारू गाळण्याचे वाढळलेले प्रमाण सर्वाधिक आहे. काही ठिकाणी लॉकडाऊन दरम्यान बिअर बार अथवा दारूची दुकाने फोडण्याच्या घटना घडत आहेत. त्याचा प्रत्यय मुंबई, सांगलीसह राज्यातील इतर भागातही आला. एकंदरीत लॉकडाऊनच्या काळात दारूचा काळाबाजार करणाऱ्यांना आणि तस्करांना अच्छे दिन येताना दिसत आहे. मात्र, राज्य उत्पादन शुल्क विभाग यावर कडक कारवाई करत आहे, ही बाब सुखावह आहे.
