मुंबई - कोरोनाचा प्रादुर्भाव रोखण्यासाठी लसीकरण हाच एकमेव पर्याय आहे. त्यामुळे देशात लसीकरण सुरू आहे. मात्र या लसीकरण मोहीमेतही काही लोकांना पैसा दिसू लागला होता. यामुळे या लसीकरणात काळाबाजार सुरू झाला आहे. काही दिवसांपूर्वी कांदिवलीच्या हिरानंदानी हेरिटेज सोसायटीतील बोगस लसीकरणानंतर उघड झाले होते. या प्रकरणातील कारवाई सुरू आहे. या बोगल लसीकरणात सहभागी असलेल्या शिवम हॉस्पिटलला टाळे ठोकण्यात आले आहे. महानगरपालिकेकडून ही कारवाई करण्यात आली असून रुग्णालयाचे रजिस्ट्रेशन सुद्धा रद्द करण्यात येणार आहे.
ग्लुकोजचे पाणी मिसळून लसीकरण..
या प्रकरणात मुंबईत ११ गुन्हे दाखल करण्यात आले असून शुक्रवारी पोलिसांनी कोकिलाबेन रुग्णालयातील बडतर्फ मार्केटिंग प्रमुख राजेश पांडे आणि राहुल दुबे या दोघांना अटक केली. या दोघांच्या अटकेमुळे बोगस लसीकरणात अटक केलेल्या आरोपींची संख्या १३वर पोहोचली आहे. या टोळीने मुंबईत दहा ठिकाणी लसीकरण शिबीर घेतले होते. बोरिवली, कांदिवली, खार, वर्सोवा, बांगुरनगर, भोईवाडा, आंबोली, समतानगर आणि ठाणे येथे प्रत्येकी एक गुन्हा नोंदविण्यात आला. जवळपास ३ हजारपेक्षा अधिक लोकांना या टोळीने ग्लुकोजचे पाणी मिसळून ती कोव्हिशिल्डच्या नावाने खपवली. १०५५ जणांना कोव्हिशिल्ड आणि कोव्हॅक्सिनची लस दिली होती.
अखेर रुग्णालय सील..
शिवम रुग्णालयाला एक लाख लसी हव्या होत्या. मात्र, एक लाख लस जर हव्या असतील तर त्यांना ५ कोटी रुपये अनामत रकमेच्या स्वरूपात संबंधित औषध कंपनीकडे जमा करणे अनिवार्य आहे. त्यामुळे सलाइन वॉटरमधून पैसे कमवून ५ कोटी जमा करण्याच्या उद्देशाने त्यांनी हा धंदा सुरू केला. त्यामुळे शिवम रुग्णालय सील करण्याबाबत पत्रव्यवहार पोलिसांनी सुरू केला होता. आज अखेर हे रुग्णालय सील करण्यात आले होते.
कसे झाले प्रकरण उघड..
लसीकरण झाल्यानंतर सोसायटीच्या सदस्यांनी प्रमाणपत्राबाबत मागणी केली असता शिबीर आयोजकांनी लस घेतलेल्या नागरिकांना डाटा मागणी केला व त्याप्रमाणे सदस्यांना विविध रुग्णालय व कोविड सेंटर या संस्थेचे लस घेतल्याबाबत प्रमाणपत्र कोविन अॅपवर देण्यात आले. मात्र, या प्रमाणापत्रात तफावत होती. याची तक्रार पोलिसांकडे केली. पोलिसांनी तपास केले असता लसीकरण बोगस असल्याचे निष्पन्न झाले. या प्रकरणात शिवम हॉस्पिटलचे संस्थापक डॉ शिवराज पटारीया आणि नीता पटारीया या दांपत्याला आधीच अटक करण्यात आली आहे.
