मुंबई - मुंबई महापालिका निवडणूक ( BMC Election ) तोंडावर आली आहे. या निवडणुकीच्या पार्श्वभूमीवर प्रभागनिहाय मतदार याद्यांचे काम पूर्ण झाले आहे. मुंबईमध्ये मागील पाच वर्षात तब्बल सात लाख 12 हजार 925 नवीन मतदार वाढले आहेत. या मतदार याद्यांवर नागरिकांना 1 जुलैपर्यंत हरकती, सूचना मांडता येणार आहे. त्यानंतर 9 जुलै रोजी अंतिम मतदार यादी जाहीर केली जाणार आहे, अशी माहिती पालिकेचे अतिरिक्त आयुक्त डॉ. संजीव कुमार यांनी दिली.
तर संपर्क साधा - भारत निवडणूक आयोगाने तयार केलेल्या व 31 मे, 2022 रोजी अस्तित्वात आलेल्या विधानसभा मतदार संघाच्या मतदार याद्या महापालिका निवडणुकांसाठी ग्राह्य धरण्यात येणार आहेत. मतदार याद्यांचे विभाजन करताना मतदाराचा चुकून प्रभाग बदलला असेल किंवा यादीत नाव असूनही प्रभागाच्या यादीत नाव नसेल अशा चुका झाल्या असतील तर त्याची दुरूस्ती करून यादीत अंतर्भाव केला जाणार आहे. यासाठी नागरिकांनी पालिकेच्या विभाग निवडणूक कार्यालयात तसेत बाहेरगावी असलेल्यांनी इमेलवर संपर्क करावा, असे आवाहन संजीव कुमार यांनी केले आहे.
7 लाख नवीन मतदार - मुंबई महापालिका निवडणुकीच्या पार्श्वभूमीवर राज्य निवडणूक आयोगाच्या निर्देशानंतर महापालिकेने 236 प्रभागांची सोडत 31 मे रोजी काढून त्यावर 1 जून ते 6 जून रोजी हरकती, सूचना मागवल्या. याचा अहवाल निवडणूक आयोगाकडे पाठवल्यानंतर आयोगाने 13 जून रोजी प्रभाग रचना निश्चित करून त्याबाबत अधिसूचना जाहीर केली. पालिकेने प्रभागनिहाय मतदार याद्यांचे कामही पूर्ण केले असून त्या 23 जून रोजी जाहीर केल्या आहेत. या याद्यानुसार 2017 सालच्या सार्वत्रिक निवडणुकीच्यावेळी म्हणजे पाच वर्षापूर्वी 91 लाख 64 हजार 125 मतदार होते. तर 2022 पर्यंत 98 लाख 77 हजार 50 इतके मतदार झाले आहेत. यानुसार मागील पाच वर्षात 7 लाख 12 हजार 925 नवीन मतदार वाढले आहेत.
- 2017 साली एकूण मतदार - 91 लाख 64 हजार 125
- 2022 साली एकूण मतदार - 98 लाख 77 हजार 50
- मागील पाच वर्षात वाढलेले एकूण मतदार - 7 लाख 12 हजार 925
