मुंबई - सुमारे दहा हजार कोटी रुपयांच्या ठेवी असलेल्या मुंबई जिल्हा मध्यवर्ती सहकारी बँकेवर ( Mumbai District Central Cooperative Bank ) अखेर पुन्हा एकदा भाजपाचे आमदार प्रविण दरेकर ( Mumbai Co-operative Bank President Pravin Darekar ) यांची अध्यक्षपदी निवड झाली आहे. काही महिन्यांपूर्वी झालेल्या निवडणुकीत प्रवीण दरेकर यांना धक्कादायकरीत्या पराभवाला सामोरे जावे लागले होते. मुंबई बँकेच्या अध्यक्षपदी सिद्धार्थ कांबळे तर उपाध्यक्षपदी विठ्ठल भोसले यांची नियुक्ती झाली होती. शरद पवार आणि मिलिंद नार्वेकर यांनी सूत्रे हलवत दरेकरांना धक्का दिला होता.
दरेकरांवर मजूर म्हणून निवडणूक लढण्याचा आरोप : प्रवीण दरेकर हे मजूर मतदार संघातून निवडणूक लढले होते. ते विधान परिषदेचे विरोधीपक्ष नेते असताना मजूर कसे असू शकतात? यावरून बराच गदारोळ झाला याबाबत त्यांची चौकशीही करण्यात आली. मात्र दरम्यानच्या काळात राज्यात सत्तांतर झाले आणि पुन्हा एकदा मुंबई बँकेत सत्तांतराचे नाट्य पाहायला मिळाले. मुंबई बँकेचे विद्यमान अध्यक्ष सिद्धार्थ कांबळे आणि उपाध्यक्ष विठ्ठल भोसले यांनी आपल्या पदाचा राजीनामा दिला त्यानंतर पुन्हा बँकेत सत्तापालट होऊन अध्यक्षपदी प्रवीण दरेकर तर उपाध्यक्षपदी सिद्धार्थ कांबळे यांची निवड झाली आहे.
'पक्षापलीकडचे राजकारण' : मुंबई बँकेच्या अध्यक्षपदी पुन्हा एकदा निवड झाल्यानंतर प्रतिक्रिया व्यक्त करताना प्रवीण दरेकर म्हणाले की, हे पक्षापलीकडचे राजकारण आहे. आमचा परस्परांमध्ये स्नेह असून आमच्यामध्ये कोणतेही मतभेद नाहीत. आता पुन्हा एकदा बँकेच्या विकासासाठी आपल्याला एकत्रितपणे काम करता येईल, असे त्यांनी सांगितले.
