मुंबई - मुंबईमध्ये दरवर्षी पावसाळ्यात पाणी साचते. पाणी साचल्यावर मुंबई ठप्प होते. ज्या ठिकाणी पाणी साचते अशा परिसरात कामे सुरू केली आहेत. ही काम अंतिम टप्प्यात आहेत. यामुळे पाणी तुंबणार नाही असे सांगू शकत नाही मात्र पाणी कमी प्रमाणात भरेल, अशी माहिती पालिकेचे अतिरिक्त आयुक्त सुरेश काकाणी यांनी दिली आहे. यामुळे यंदाही पावसाळ्यात काही प्रमाणात का होईना पाणी तुंबण्याच्या प्रकाराला मुंबईकरांना समोर जावे लागणार आहे.
'पाणी कमी प्रमाणात भरेल'
मुंबईमध्ये मेट्रोची ट्रायल रन सुरू आहे. या दरम्यान कोणताही अपघात होऊ नये यासाठी काय काळजी घ्यावी व अपघात झाल्यास कोणत्या प्रकारची काळजी घ्यावी याबाबतचे प्रशिक्षण मुंबई महापालिकेच्या आपत्कालीन व्यवस्थापन विभागाकडून मेट्रो कर्मचाऱ्यांना देण्यात आले. यानंतर काकाणी पत्रकारांशी बोलत होते. यावेळी बोलताना मुंबईमध्ये ११ जूनला पाऊस येईल असा अंदाज हवामान विभागाने दिला आहे. त्यासाठी पालिका सज्ज झाली आहे. पावसात पडणारी झाडे हटवण्याची कामे पालिका करते. सोसायटीच्या आवारात असलेली धोकदायक झाडे हटवण्याच्या सूचना दिल्या जातील. ज्या ठिकाणी मनुष्यबळ वाढवण्याची गरज आहे त्याठिकाणी वाढवले जाईल. नालेसफाई पावसाअगोदर केली जाईल. ज्या ठिकाणी पाणी साचते तिथे पंप लावले आहेत. भुयारी टाक्या बांधण्याचे काम सुरू आहे. भुयारी टाक्यांमध्ये पाणी साचवले जाईल. समुद्राची भरती गेली की पाणी समुद्रात सोडले जाईल. हिंदमाता येथे जे काम आहे ते अंतिम टप्यात आहे. पाणी तुंबणार नाही असे सांगू शकत नाही पण कमी प्रमाणात भरेल याची शक्यता नाकारता येत नाही असे काकाणी म्हणाले.
मेट्रोच्या कर्मचाऱ्यांना प्रशिक्षण
मुंबईत मेट्रोची ट्रायल रन डीएननगर ते दहिसर या ठिकाणी केली जात आहे. यादृष्टीने आपत्तीच्या वेळी कोणती खबरदारी घेण्यात यावी यासाठी पालिकेच्या आपत्ती व्यवस्थापनाकडून कर्मचाऱ्यांना प्रशिक्षण दिले जात आहे. मेट्रोची टेस्ट करताना कोणती घटना घडू नये यासाठी दोन दिवसात 40 कर्मचाऱ्यांना प्रशिक्षण दिले जात आहे. आपत्तीजनक घटना घडत असेल तर त्यावेळेस कोणती खबरदारी घेण्यात यावी यासाठी कर्मचाऱ्यांना प्रशिक्षण दिले जात आहे.
म्यूकरमायकोसिचे 350 सक्रिय रुग्ण
म्यूकरमायकोसिसचे सध्या ३५० सक्रिय रुग्ण आहेत. त्यातील ७० टक्के रुग्ण मुंबई बाहेरचे आहेत. म्यूकरमायकोसिसच्या रुग्णांची वाढ कमी होत आहे. रुग्णाला रुग्णालयात दाखल करून योग्य ते उपचार केले जात आहे. असे काकाणी यांनी सांगितले.
तिसऱ्या लाटेसाठी डॉक्टरांना प्रशिक्षण
मुंबईत कोरोनाची दुसरी लाट ओसरत आहे. लहान मुलांमध्ये तिसऱ्या लाटेचा धोखा जास्त असू शकेल त्यासाठी पूर्व तयारी करत आहोत. 200 ते 250 खाटांचे कोविड सेंटर एका वार्डात असेल. टास्क फोर्सच्या सूचनेनुसार काम केले जात आहे. टास्क फोर्स सूचना देतील त्यावर आम्ही काम करत आहोत. जेव्हा औषध लागतील त्यानुसार पुरवठा केला जाईल. मुंबईत तीन मॅटर्निटी होम तयार करत आहोत. लहान मूल आणि स्तनदा मातांना वेगळे वार्ड तयार केले जात आहेत. महिला आणि बालक यांना लागण झालीच तर काळजी घेतली जाईल. उपचार योग्य पद्धती समान राहावी म्हणून डॉक्टरांना प्रशिक्षण दिले जात आहे, असे काकाणी यांनी सांगितले.
व्यापाऱ्यांसाठी सम-विषम कार्यपद्धती
लॉकडाऊन शिथील करण्याबाबत जर राज्य शासनाकडून निर्णय आला तर आम्ही पालन करू आणि धोरणात आणखी शिथिलता आणू. मुंबईत सम विषम कार्यपद्धती लागू केली आहे. राज्य शासनाचे बदल करायचे आदेश असतील तसे आम्ही काम करू. सम आणि विषम करण्याचे काम स्थानिक अधिकाऱ्यांना दिले आहेत. त्यामुळे संभ्रम राहू नये असे काकाणी म्हणाले.
विद्यार्थी, स्तनदा मातांसाठी लसीकरण
मुंबईत ४५ वर्षांवरील नागरिकांचे लसीकरण सुरू आहे. सोमवार, मंगळवार आणि बुधवार वॉक इन पद्धतीने सुरू राहील. लसीचा तुटवडा असल्याने ग्लोबर टेंडर मागवले आहे. त्याला अंतिम रूप येऊ शकेल. राज्य शासनाकडे आम्ही पाठपुरावा केला आहे असे काकाणी यांनी सांगितले. परदेशात जाणाऱ्या विद्यार्थ्यांचे लसीकरण केले जात आहे. तसेच स्तनदा मातांचेही लसीकरण केले जात आहे. त्यासाठी 3 केंद्र निश्चित केली आहेत. लसीकरण केंद्र वाढवण्याची गरज वाटत नाही असे काकाणी यांनी सांगितले.
सामान्यांना रेल्वे सेवा बंदच
मुंबईमधील सामान्य नागरिकांना रेल्वेमधून प्रवास करण्यास मुभा देण्याबाबत आम्ही राज्य शासनाची वाट पाहत आहोत. पॉझिटिव्ह रेट आणि बेडची क्षमता यावर रेल्वे सुरू करण्याबाबतचा निर्णय घेतला जाईल.
हेही वाचा - चेन्नईतील सिंहिणीचा कोरोनामुळे मृत्यू; जगातील पहिलीच घटना
