मुंबई - कोविड संदर्भात विविध समस्यांप्रकरणी हायकोर्टात दाखल विविध याचिकांवरील सध्या एकत्रित सुनावणी सुरू आहे. ज्यात खाजगीत लोकांना कोरोनावरील औषध वाटणाऱ्यांवर कारवाईचे निर्देश हायकोर्टाने राज्य सरकारला दिले आहेत. यात वांद्रे पूर्व येथील आमदार जिशान सिद्दीकी आणि अभिनेता सोनू सूद यांची नाव पुढे आहेत. न्यायमूर्ती दिपांकर दत्ता आणि न्यायमूर्ती गिरीश कुलकर्णी यांच्या खंडपीठासमोर सुनावणी घेण्यात आली.
कोणतेही गैरकृत्य केलं नाही -
"कोरोनाकाळात केवळ लोकांची मदत करण्याच्या भावनेतून औषधं त्यांच्यापर्यंत पोहचवली", असा सोनू सूदच्या वकिलांनी मुंबई उच्च न्यायालयात दावा केला. त्यावेळी सोनू सूद यानं अॅड मिलन देसाई यांच्यामार्फत मध्यस्थी याचिका दाखल केली आहे. ज्यात त्याने आपण कोणतेही गैरकृत्य केलेले नाही, काही लोक निव्वळ आपली बदनामी करून आपण करत असलेल्या जनकल्याणाच्या कामात अडथळा निर्माण करत आहेत' असा दावा सोनू सूदच्या वतीने करण्यात आला. कोरोनाच्या संकटकाळात चुकीचे असे मी काहीच केलेले नाही, केवळ गरजू लोकांना मदत करण्याच्या हेतूनेच आपल्या संस्थेमार्फत रेमडेसिवीर इंजेक्शनचे गरजवंतांना वाटप केले. रेमडेसिवीर इंजेक्शनचा तुटवडा असताना सेलिब्रिटींना परस्पर हे इंजेक्शन मिळाल्याने हायकोर्टानं याची गंभीर दखल घेतली होती.
'खासगीत औषधं पोहचवून कोणी स्वत:ला देवदूत समजू नये' - न्यायालय
कोरोनाच्या काळात आपण अखंडपणे लोकहिताचे काम केले. पहिल्या लाटेत घरी परतणाऱ्या मजुरांना मदत केली. तर दुसऱ्या लाटेत लोकांना आवश्यक असलेली औषधे उपलब्ध होत नव्हती ती आपण केवळ दुआ म्हणून त्यांच्यापर्यंत पोहचवण्याचे काम केल असा युक्तिवाद सोनू सूद ह्यांच्या वकिलांनी केला. मुंबई उच्च न्यायालयाने ह्या संदर्भात बुधवारपर्यंत सुनावणी तहकूब केली.
