मुंबई - जगभरात कोरोना विषाणूचा नवीन व्हेरियंट असलेल्या ओमायक्राॅनचे ( Omicron Variant ) रुग्ण आढळून येत आहेत. मुंबईतही परदेशातून आलेले ओमायक्राॅनचे दोन रुग्ण आढळले आहेत. ओमायक्राॅनच्या रुग्णांवर उपचार करण्यासाठी मुंबई महापालिकेने सेव्हन हिल रुग्णालयातील एक मजला राखीव ठेवला असून त्यातील 250 बेड्स सज्ज ठेवण्यात आले आहेत.
250 बेड्स सज्ज -
कोरोना विषाणूचा ओमायक्राॅन हा नवा व्हेरियंट ( Omicron Variant) समोर आला आहे. ओमायक्राॅनला मुंबई विमानतळावरच रोखण्यासाठी पालिकेने जय्यत तयारी केली आहे. विमानतळावर येणाऱ्या प्रवाशांची चाचणी केली जात आहे. जे प्रवासी कोरोना पॉझिटिव्ह येत आहेत किंवा ज्यांना ओमायक्राॅनची लागण झाली आहे अशा रुग्णांवर उपचार करण्यासाठी वेगळी व्यवस्था असणे गरजेचे आहे. त्यासाठी पालिकेने अंधेरी मरोळ येथील सेव्हन हिल रुग्णालय सज्ज ठेवले आहे. या रुग्णालयातील एक मजला व त्यामधील 250 बेड्स कोरोना पॉझिटिव्ह तसेच ओमायक्रॉन पॉझिटिव्ह रुग्णांवर उपचार केले जात आहेत. या शिवाय ताडदेव येथील ब्रीच कॅडी आणि बाॅम्बे रुग्णालयात प्रत्येकी दहा बेड्स तयार ठेवण्यात आले असल्याची माहिती अतिरिक्त आयुक्त सुरेश काकाणी यांनी दिली.
23 प्रवासी कोरोना पॉझिटिव्ह -
मुंबई विमानतळावर 10 नोव्हेंबर ते 6 डिसेंबर दरम्यान हायरिस्क देशातून 4 हजार 845 प्रवासी मुंबईमध्ये आले आहेत. या सर्वांचा शोध घेण्याचे व चाचण्या केल्या जात आहेत. आतापर्यंत करण्यात आलेल्या चाचण्यांपैकी 23 प्रवासी कोरोना पॉझिटिव्ह आढळून आले आहेत. यात 19 पुरुष तर 4 महिला प्रवासी आहे. या पॉझिटिव्ह प्रवाशांच्या संपर्कात आलेल्या लोकांचा शोध घेतला जात आहे. या सर्व पॉझिटिव्ह प्रवासी रुग्णांना रुग्णालयात भरती करण्यात आले असून त्यांचे नमुने जिनोम सिक्वेनसिंग तसेच एस जिन चाचणीसाठी पाठवण्यात आले असल्याची माहिती पालिकेच्या आरोग्य विभागाच्या मुख्य कार्यकारी आरोग्य अधिकारी डॉ. मंगला गोमारे यांनी दिली आहे.
हे ही वाचा - Maharashtra Corona Update : 1087 रुग्णांना डिस्चार्ज, 699 नवे रुग्ण तर 19 रुग्णांचा मृत्यू
