सांगलीत तयार झाले कोरोनावर इंजेक्शन! रुग्ण ठणठणीत बरा होणार, कंपनीचा दावा

सांगली जिल्ह्यातील आयसेरा बायोलॉजीकल या कंपनीने कोरोनावर इंजेक्शन तयार केल्याचा दावा केला आहे. दोन इंजेक्शनमध्ये कोरोनाबाधित रुग्ण बरा होऊ शकतो, असे या कंपनीचे मत आहे. सध्या या इंजेक्शनच्या प्राण्यांवरील चाचण्या यशस्वी झाल्या आहेत. आता आयसीएमआरच्या परवानगीच्या प्रतीक्षेत ही कंपनी थांबली आहे. या इंजेक्शनमुळे कोरोना रुग्ण ठणठणीत बरा होऊ शकतो, याचा हमखास दावा कंपनीने केला आहे.

कोल्हापूर/सांगली - सध्या देशभरात कोरोना विषाणूने थैमान घातले आहे. लसीकरणाचा तुटवडाही मोठ्याप्रमाणात निर्माण झाला आहे. लसीकरणाचा वेग वाढणे गरजेचे आहे. मात्र, एक-दोन इंजेक्शनमध्ये कोरोना रुग्ण ठणठणीत बरा होईल, असा हमखास दावा अजूनपर्यंत कोणीही केला नाही. जगभरात अनेकजण यावर अजूनही संशोधन करत आहेत. मात्र सांगली जिल्ह्यातल्या 'आयसेरा बायोलॉजीकल' या औषध निर्माण कंपनीने हा दावा केला असून त्यांनी 'अँटीकोव्हिड सीरम' नावाचे इंजेक्शन बनवले आहे. काय आहे याचे वैशिष्ट्य आणि कंपनीने नेमका काय दावा केला आहे, यावरचा 'ईटीव्ही भारत'चे प्रतिनिधी शेखर पाटील यांचा विशेष रिपोर्ट...

आयसेरा बायोलॉजीकल' या औषध निर्माण कंपनी

कुठे आहे कंपनी; इजेक्शनचा कसा होणार वापर-

सांगली जिल्ह्यातल्या शिराळामध्ये गेल्या काही वर्षांपासून औषध निर्माण क्षेत्रात काम असलेल्या 'आयसेरा बायोलॉजीकल' या कंपनीने कोरोनावर 'अँटीकोव्हिड सीरम' नावाचे इंजेक्शन तयार केले असून रुग्णांना दोन इंजेक्शन दिल्यानंतर रुग्ण ठणठणीत बरा होऊ शकतो असा या कंपनीतील शास्त्रज्ञांनी दावा केला आहे. हे इंजेक्शन काय आहे हे सोप्या भाषेत सांगायचे झाले तर कोरोनाचे विषाणू घोड्याच्या शरीरात टोचून त्याच्या शरीरात अँटिबॉडीज तयार करायचे. त्यानंतर अँटीबॉडीज असलेल्या घोड्याच्या रक्तातील 'अँटीसेरा' काढून तयार केलेले इंजेक्शन कोरोना रुग्णांना द्यायचे, अशी ही प्रक्रिया असल्याचे 'आयसेरा बायोलॉजीकल' चे संचालक दिलीप कुलकर्णी आणि नंदकुमार कदम यांनी 'ईटीव्ही भारत'शी बोलताना सांगितले. तसेच या इंजेक्शनमुळे कोरोना रुग्ण ठणठणीत बरा होऊ शकतो, याचा हमखास दावा सुद्धा कंपनीने केला आहे.

परवानगी रखडली; खासदार मानेंकडून पाठपुरावा सुरू-

आयसेरा या कंपनीला संशोधन करून 'अँटिकोव्हिड सीरम' हे कोरोना प्रतिबंधात्मक इंजेक्शन तयार करण्यात यश आले आहे. या इंजेक्शनच्या प्राण्यांवरील चाचण्या यशस्वी झाल्या असून मानवी वापराच्या चाचणीसाठी मात्र आता 'आयसीएमआर'च्या परवानगीची त्यांना प्रतीक्षा आहे. त्यासाठी या मतदारसंघातील खासदार धैर्यशील माने यांनी सुद्धा पाठपुरावा सुरू केला असून मुख्यमंत्री उद्धव ठाकरे आणि भारताचे पंतप्रधान नरेंद्र मोदी यांच्याकडे सुद्धा पत्रव्यवहार केला आहे. कोरोनाच्या कोणत्याही स्ट्रेन्सना तसेच भयानक म्युटेंटवरही हे इंजेक्शन एक जालीम उपाय असेल, असा दावा या कंपनीने केला आहे. त्यामुळे 'आयसीएमआर' यासाठी परवानगी देणार का? हे पाहावे लागणार आहे.

आयसेरा बायोलॉजीकल' या औषध निर्माण कंपनी

खासदार धैर्यशील माने यांचा पाठपुरावा -