ठाणे - कल्याण पश्चिम परिसरातील एका हायप्रोफाईल इमारतीमधील घराला भीषण आग लागल्याची घटना घडली आहे. या आगीत घरातील संपूर्ण संसार उपयोगी साहित्य जळून खाक झाले आहे. मात्र, वेळेतच अग्निमशन दलाच्या जवानांच्या शर्थीच्या प्रयत्नामुळे पुढील होणारी मोठी दुर्घटना टळली आहे.
वातानुकूलित यंत्रणेत बिघाड झाल्याने आग
कल्याण पश्चिम भागात गोदरेज हिल परिसरात टेकडीवर कॅसोरीन नावाची हायप्रोफाईल इमारत आहे. या इमारतीच्या चौथ्या मजल्यावर असलेल्या एका फ्लॅटमध्ये भीषण आग लागली. या फ्लॅटमधील वातानुकूलित यंत्रणेत बिघाड झाल्याने ही आग लागल्याची माहिती समोर आली आहे. खळबळजनक बाब म्हणजे आग लागली त्यावेळी काही सदस्य घरामध्येच होते. या आगीने काही वेळातच भीषण रूप धारण केल्याने संपूर्ण घर आगीच्या विळख्यात सापडले. ही आग एवढी मोठी होती की, गॅलरीमधून शेजारच्या घरांनाही आगीची झळ पोहचली. मात्र, कल्याण डोंबिवली महापालिकेच्या अग्निशमन दलाच्या जवानांच्या शर्थीच्या प्रयत्नामुळे आग आटोक्यात आली आणि पुढील होणारी मोठी दुर्घटना टळली आहे. मात्र, या आगीत घरातील संपूर्ण संसार उपयोगी साहित्य जळून खाक झाले. वेळेतच घरातील सदस्य घराबाहेर पडल्याने जीवितहानी टळली असून, या घटनेत कोणीही जखमी झाले नाही.
हेही वाचा - प्लास्टिक खुर्ची मोडल्याच्या वादातून शेजाऱ्यावर सुरीने हल्ला, दोन भावांविरोधात गुन्हा दाखल
हेही वाचा - शौचालयाच्या टाकीत पडून चार वर्षाच्या चिमुरडीचा मृत्यू; पालिकेचा निष्काळजी पणा?
