गंगापूर(औरंगाबाद) : टायर फुटल्याने अनियंत्रित झालेले ट्रॅक्टर नदीत कोसळून झालेल्या भीषण अपघातात एक जण ठार, तर दहा जण जखमी झाल्याची घटना औरंगाबादच्या गंगापूरमध्ये घडली आहे. जखमींना उपचारासाठी औरंगाबादमधील रुग्णालयात दाखल करण्यात आले आहे.
टायर फुटून ट्रॅक्टर कोसळला नदीत
याविषयी सविस्तर वृत्त असे की, गंगापूर तालुक्यातील लाझी गावाजवळ असलेल्या खाम नदीच्या पुलावरून जाणाऱ्या एका ट्रॅक्टरचे टायर फुटल्याने चालकाचे ट्रॅक्टरवरील नियंत्रण सुटले. यावेळी हा ट्रॅक्टर थेट नदीत जाऊन कोसळला. या दुर्घटनेत एक जण ठार तर दहा ऊसतोड मजूर जखमी झाले. संदीप दिलीप घोरपडे असे अपघातातील मृताचे नाव असून तो कचनेरचा रहिवासी होता.
ऊसतोड करून घरी परतताना अपघात
परिसरात ऊसतोड मोठ्या प्रमाणावर सुरू असून ऊसतोड झाल्यानंतर सायंकाळी ट्रॅक्टरच्या ट्रॉलीमध्ये बसून हे मजून घरी परततात. मजूर घरी जात असतानाच ही घटना घडली. दरम्यान, घटनेतील जखमींना उपचारासाठी औरंगाबादेतील शासकीय रुग्णालयात दाखल करण्यात आले आहे.
