देऊळ बंद..! कोरोनाच्या सावटाखाली नवरात्री महोत्सवाला सुरुवात, भक्तांचा हिरमोड

राज्यासह देशभरात आजपासून नवरात्र उत्सवाला प्रारंभ झाला आहे. मात्र राज्यात सध्या कोरोनाचा संसर्ग वाढत असल्याने मंदिरे अद्यापही बंद आहेत. नवरात्रीच्या या काळात मंदिर बंद असल्याने भाविकांचा हिरमोड झाला आहे. असे असले तरी औरंगाबादमध्ये भाविकांनी आज पहाटेच दर्शनासाठी कर्णपुरा मंदिर परिसरात गर्दी केली होती.

औरंगाबाद - आजपासून नवरात्री महोत्सवाला सुरुवात झाली आहे. मात्र, सध्या राज्यात कोरोनाचे संकट घोंगावत आहे. त्यामुळेच यावेळी कुठलाही महोत्सव साजरा करता येणार नाही, असे निर्देश राज्य सरकारकडून देण्यात आले आहेत. परिणामी औरंगाबाद जिल्ह्यातील देवींचे मंदिरे बंद ठेवण्यात आली आहेत. तरही दुर्गाभक्तांची पाऊले आपोआप मंदिराकडे वळत असल्याचे पाहायला मिळत आहे. मंदिरातील परिस्थितीचा आढावा घेतला आमचे प्रतिनिधी अमित फुटाणे यांनी..

औरंगाबाद शहरातील कर्णपुरा देवी मंदिरात पहाटेपासून भक्त मंदिर परिसरात येत आहेत. मात्र मंदिर बंद असल्याने बाहेरील प्रवेशद्वारातूनच मुखदर्शन घेऊन भक्त निराश होईन परतत आहेत. सकाळी सात वाजता मंदिर विश्वस्तांनी घटस्थापना आणि मुख्य आरती करून महोत्सवाची सुरुवात केली.कर्णपुरा देवी ही तुळजापूरच्या देवीचे प्रतिरूप असून दरवर्षी मोठ्या प्रमाणात महोत्सव साजरा केला जातो. मोठी जत्रा मंदिर परिसरात भरते आणि लाखोंच्या संख्येने भक्त मंदिरात देवीच्या दर्शनासाठी येत असतात. मात्र यावर्षी कोरोनाचे सावट असल्याने राज्यातील देवस्थान बंद ठेवण्यात आले असल्याने भक्तांना दरवर्षीप्रमाणे नवरात्रीच्या पहिल्या माळेला देवीचे दर्शन घेता आले नाही. मात्र, काही भक्त सकाळी चार वाजेल्यापासूनच मंदिर परिसरात दाखल झाल्याचे पाहायला मिळाले.

देवीचे मंदिर बंद असल्याने भक्तांना बाहेरील जाळीतून मुखदर्शन घ्यावे लागले. सकाळी सातच्या सुमारास मंदिर विश्वस्त असलेल्या दानवे कुटुंबीयांनी देवीची विधीवत पूजाअर्चा करत घटस्थापना केली. यंदा कोरोनाचे सावट असल्याने भक्तांचा हिरमोड होत असला तरी पुढच्या वर्षी ही महामारी नष्ट होऊ दे अशी कामना भक्तांनी देवीच्या चरणी केली. मंदिर उघडली तर नवरात्रात मंदिरात होणारी गर्दी टाळण्यासाठी राज्य सरकारने निर्णय घेतला असल्याचं कर्णपुरा मंदिर विश्वस्त शिवसेना आमदार डॉ. अंबादास दानवे यांनी सांगितले.