वैजापूर (औरंगाबाद) : नागपूर व पिंपरी-चिंचवड येथील पोलिस भरती घाेटाळ्यातील बनावट परीक्षार्थींच्या (Police recruitment racket) रॅकेटचे धागेदाेरे वैजापुरात मिळाले आहेत. नागपूर व पिंपरी-चिंचवड पोलिसांनी (Chinchwad Police) संजरपूरवाडी व तराट्याची वाडी येथून रॅकेट चालवणाऱ्या टोळीचा पर्दाफाश केला आहे. पोलिस भरती परीक्षेत मूळ परीक्षार्थींकडून १३ लाखांच्या आर्थिक मोबदल्यात लेखी व मैदानी परीक्षा उत्तीर्ण करून देण्याची हमी या टोळीकडून दिली जात होती.
वैजापूर तालुक्यातील संजरपूरवाडी येथील जयलाल कारभारी कंकरवाल (२२) याला नागपूर व वैजापूर पोलिसांच्या पथकाने अटक केली. तर साथीदार अर्जुन चुडामण जारवाल फरार झाला होता. यानंतर पोलीसांना मिळालेल्या माहितीच्या आधारे चरणसिंग मानसिंग काकरवाल व किशन सीताराम जोनवाल यांच्या शोधार्थ पोलिस पथक वैजापुरात दाखल झाले आहे.
पोलीसांना असा लावला प्रकरणाचा छडा
पोलिस भरती प्रक्रियेत परीक्षार्थी विद्यार्थ्यांचे परीक्षा केंद्रात प्रवेशादरम्यान बायोमेट्रिक प्रणाली यंत्राद्वारे हाताचे ठसे नोंदवले जातात. तशीच प्रक्रिया मैदानी चाचणी परीक्षेदरम्यान घेतली जाते. ऑनलाइन इन कॅमेऱ्याच्या निगराणीत पूर्ण परीक्षा प्रक्रिया घेतली गेली. तथापि, परीक्षेत गैरप्रकार करण्यात आलेल्या सराईत आरोपींनी पोलिसांना गुंगारा दिला होता. या पोलिस भरती घोटाळ्यात पोलिसांनी आतापर्यंत राज्यभरातील धागेदोरे शोधून काढले आहेत. ते आता औरंगाबादच्या वैजापूरपर्यंत आले आहेत.
हेही वाचा - Retreat Ceremony Stopped : कोरोनाच्या पार्श्वभूमीवर अटारी सीमेवर नागरिकांना बंदी
