मराठा आरक्षणासाठी तरुणाचा विष पिऊन आत्महत्येचा प्रयत्न

मराठा आरक्षणाच्या मागणीसाठी एका तरुणाने विष पिऊन आत्महत्या करण्याचा प्रयत्न केला. तरुणांवर घाटी रुग्णालयात उपचार सुरू आहेत.

औरंगाबाद - मराठा आरक्षणाच्या मागणीसाठी दत्ता कचरू भोकरे (वय २७, रा.शिवाजीनगर मुळ गाव येसगाव ता.खुलताबाद) या तरुणाने विष पिऊन आत्महत्या करण्याचा प्रयत्न केला. दरम्यान पोलिसांनी त्याला वेळीच रोखले. पोलिसांनी त्याला तत्काळ घाटी रुग्णालयात दाखल केले. त्याच्यावर घाटी रुग्णालयात उपचार सुरू आहेत.

अधिक माहिती अशी की, दत्ता हा एका खासगी कंपनीत काम करतो. मात्र त्याला काही दिवसांपूर्वी कंपनीने गॅप दिला होता. त्याचं अकरावीपर्यंत शिक्षण झालेलं आहे. तो बारावी कला शाखेत अनुत्तीर्ण असल्याची माहिती पोलिसांनी दिली. संध्याकाळपर्यंत दत्ता घरी होता. सायंकाळी सहा वाजण्याच्या सुमारास भाजीपाला आणण्यासाठी तो ५० रुपये घेऊन गेला. त्यानंतर पुढे काय झालं हे माहीत नसल्याचे मोठा भाऊ भग्येश्र्वर भोकरे यांनी सांगितले. दत्ता याला एक मोठा भाऊ असून तो मजुरी करतो. त्याच्या दोन बहिणींचे लग्न झालेलं आहे.

तरुणांनी टोकाचे पाऊल उचलू नये -विनोद पाटील

दरम्यान या घटनेवर मराठा आरक्षण याचिकाकर्ते विनोद पाटील म्हणाले, की ज्या तरुणांसाठी ही आरक्षणाची लढाई लढायची आहे. त्याच तरुणांनी असे टोकाचे पाऊल उचलले तर आपण अतिशय चुकीच्या पद्धतीने जातोय. त्यामुळे सर्व तरुणांना आवाहन आहे, कोणीही असे टोकाचे पाऊल उचलू नये.