अमरावती : शाळा सुरू होण्याचा दिवस उजाडला. मात्र, जिल्हा परिषदेच्या शाळांच्या दुरुस्तीचे काम जिल्हा परिषदेने उन्हाळ्याच्या सुट्यांमध्ये केलेच नाही. यामुळे आता गळणाऱ्या छताखालीच जिल्ह्यातील अनेक शाळा भरणार आहेत. अमरावती शहरापासून अवघ्या दहा किलोमीटर अंतरावर असणाऱ्या भानखेडा बुजुर्ग येथील डिजिटल शाळेचीदेखील अशीच अवस्था आहे. गरीबांची मुले शिकत असणाऱ्या शाळेच्या दूरवस्थेकडे प्रशासनाचे काहीही लक्ष नाही, असेच दुर्दैवी चित्र सध्या तरी आहे.
अशी आहे शाळेची अवस्था : अमरावती शहरापासून अवघ्या दहा किलोमीटर अंतरावर असणाऱ्या भानखेडा बुजुर्ग येथील जिल्हा परिषदेच्या शाळेची अवस्था अतिशय विदारक अशी आहे. इयत्ता पहिली ते सातवीपर्यंतचे वर्ग या शाळेत भरतात. शाळेच्या खोल्यांवर पत्रे टाकलेले आहेत. त्या पत्र्यांना अनेक ठिकाणी छिद्रे पडलेली आहेत. जोराच्या वादळी वाऱ्यात काही पत्रे उडून जाण्याची शक्यता आहे. शाळा सुरू असताना अशी घटना घडली तर ती मुलांच्या जीवावर बेतू शकते. टिन उडण्यासारखे प्रकार घडले, तर मोठा अपघात होण्याची शक्यतादेखील या ठिकाणी आहे. खिडक्यांची लावलेले पत्रेही गंजलेले आहेत. त्याला हात लागून विद्यार्थी जखमी होऊ शकतात.
शौचालयाची अवस्था खराबच : या शाळेच्या आवारात असणाऱ्या मुला-मुलींच्या स्वतंत्र शौचालयाची अवस्था अतिशय खराब आहे. शौचालयाचे लोखंडी पत्र्याचे दार अर्धवट तुटलेले आहे. मुलींसाठी असणाऱ्या शौचालयाला दारच नाही. एकूणच उन्हाळ्याच्या सुटीत जिल्हा प्रशासनाने शाळा दुरुस्तीसाठी कोणतेही काम केले नसल्याचे दिसत आहे. याची शिक्षा मात्र ऐन पावसाळ्यात विद्यार्थ्यांना भोगावी लागणार आहे.
सरपंच, उपसरपंच म्हणतात निधीचा अभाव : आमच्या गावातील शाळेची अवस्था अतिशय खराब आहे, हे आम्हाला मान्य आहे. शाळेच्या दुरुस्तीचे काम व्हावे, अशी मागणी आम्ही प्रशासनाकडे वारंवार केली आहे. शाळेच्या विकासाबाबत केलेल्या पत्रव्यवहाराच्या प्रती आमच्याकडे आहेत. शाळेचे छत दुरुस्ती करण्यासह रंगरंगोटीचे काम करणेसुद्धा आवश्‍यक आहे. मात्र, केवळ एक दीड लाखांच्या तोकड्या निधीमध्ये शाळेचे कोणतेही काम समाधानकारकरित्या पूर्ण होऊ शकत नाही. आमच्या मतदारसंघाचे लोकप्रतिनिधी तसेच जिल्हा प्रशासनाचे अधिकारीसुद्धा शाळेच्या सुधारणेकडे लक्ष देत नाहीत, असे भानखेडा गावाच्या सरपंच वनिता ठाकरे 'ई टीव्ही'भारत' शी बोलताना म्हणाल्या. उपसरपंच नारायण महिंगे यांनीदेखील अशीच खंत व्यक्त केली आहे.
ग्रामस्थ म्हणतात शाळेची दुरुस्ती होणे गरजेचे : आज या शाळेत इयत्ता पहिली ते सातवीपर्यंत 50 ते 60 विद्यार्थी शिकत आहेत. गावातील या मुलांना शाळेत योग्य सुविधा असायलाच हव्यात. या शाळेची अख्खी इमारतच खराब झाली आहे. त्यामुळे नवीन इमारतच बांधणे गरजेचे होते. गावच्या सरपंच गावातील विकासकामांसाठी प्रयत्न करतात. मात्र, शाळेसाठी प्रशासनाच्या वतीने निधी दिला जात नाही. शाळेत शौचालयाचीदेखील योग्य व्यवस्था नाही. प्रशासनाने आमच्या गावातील शाळा नीटनेटकी करावी, असे अभिलाष ठाकरे ग्रामस्थ "ई टीव्ही" भारतशी बोलताना म्हणाले.
हेही वाचा : Palghar Zilla Parishad School : 'ईटिव्ही भारत'च्या वृत्तानंतर चिंचणीतील शाळेचे बांधकाम नव्याने सुरू
