अमरावती - अमरावती शहरातील राजापेठ उड्डाणपुलावर छत्रपती शिवाजी महाराजांचा ( Shivaji Maharaj Statue Remove In Amravati ) अनधिकृत रित्या पुतळा बसवण्याचे प्रकरण आज दुसऱ्या दिवशीही तापले आहे. छत्रपती शिवाजी महाराजांचा पुतळा महापालिका प्रशासनाने काढल्याचा निषेधार्थ आज युवा स्वाभिमान संघटनेच्या ( yuva Swabhiman Agitation In Amravati ) कार्यकर्त्यांनी महापालिकेवर मोर्चा काढला. यावेळी युवा स्वामी यांच्या कार्यकर्त्यांनी महापालिकेच्या प्रवेशद्वारासमोर पोलिसांवर ( Yuva Swabhiman Thrown Bangles On Police ) बांगड्या भिरकावल्या.
महापालिकेसमोर प्रचंड तणाव -
आज युवा स्वाभिमान संघटनेचे तीन नगरसेवक राजीनामा देण्यासाठी कार्यकर्त्यांसह महापालिकेच्या प्रवेशद्वारासमोर धडकले. यावेळी पोलिसांनी केवळ तीन नगरसेवकांनाच आयुक्तांना भेटण्याची परवानगी दिली. यावेळी युवा स्वाभिमान संघटनेच्या महिला कार्यकर्त्यांनी सोबत आणलेला बांगड्या अचानक पोलिसांच्या दिशेने भिरकावल्या. यानंतर पोलिसांनी मात्र युवा स्वाभिमानच्या कार्यकर्त्यांची धरपकड केली. या स्वाभिमान संघटनेचे कार्यकर्ते यावेळी सैरावैरा पळत सुटल्यामुळे राजकमल चौकात तणावाचे वातावरण निर्माण झाले होते.
महिला पोलीस जखमी -
युवा स्वाभिमान संघटनेच्या कार्यकर्त्यांनी पोलिसांवर बांगड्यांचा मारा केल्यामुळे एक महिला पोलीस कर्मचारी जखमी झाली आहे. या प्रकारानंतर पोलिसांनी संघटनेच्या कार्यकर्त्यांना अटक केली असून महापालिकेच्या प्रवेशद्वारासमोर पोलिसांचा राज्य राखीव पोलीस दलाचा ताफा तैनात करण्यात आला आहे.
काय आहे प्रकरण -
शहरातील राजापेठ उड्डाणपुलावर चार दिवसांपूर्वी आमदार रवी राणा यांनी मध्यरात्री कार्यकर्त्यांना सोबत घेऊन छत्रपती शिवाजी महाराजांचा पुतळा बसवला होता. आमदार रवी राणा यांनी कुठलीही परवानगी न घेता हा पुतळा बसवला होता. त्यामुळे शहरात मोठे राजकारण तापले होते. मात्र, शेकडो पोलिसांच्या बंदोबस्तात प्रशासनाने मध्यरात्री हा पुतळा तेथून काढला. त्यामुळे अमरावतीत तणावाचे वातावरण आहे.
