वडाळी उद्यानाच्या तिकीट घरातून दारू विक्री; पोलीस आयुक्तांकडे तक्रारी करूनही कारवाई शून्य

कोरोना काळात सार्वजनिक ठिकाणी नागरिकांच्या एकत्रित होण्यावर बंधने आली. यामुळे शहरातील महापालिकेचे वडाळी उद्यानही बंद करण्यात आले. मात्र, या बंद पडलेल्या उद्यानाच्या तिकीट घरातून दारू विक्रीचा प्रकार सुरू असल्याचे समोर आले आहे.

अमरावती - अमरावती महापालिकेचे एकमेव पर्यटन उद्यान अशी ओळख असणाऱ्या वडाळी उद्यानाच्या तिकीट घरात सध्या दारूची विक्री सुरू आहे. कोरोनामुळे उद्यान बंद आहे, तर उद्यानाचे कंत्राट संपुष्टात आल्याने कंत्राटदार उद्यान सोडून निघून गेले आहेत. अशातच उद्यानात सध्या अवैध धंद्यांना ऊत आला आहे.

शहरातील फ्रेजारपुरा पोलीस ठाण्याच्या हद्दीत वडाळी परिसर येतो. या परिसरात अवैध दारू विक्री, जुगार आणि वरली मटका खुलेआम सुरू असतो. परिसरातील काही नागरिकांनी नुकतीच बदली झालेल्या पोलीस आयुक्त संजय बाविस्कर यांच्याकडे शेकडो तक्रारी केल्या होत्या. मात्र, पोलीस आयुक्तांनी या प्रकरणाची कधीही गांभीर्याने दखल घेतली नाही. यामुळे परिसरातील अवैध दारू विक्रेत्यांची मजल थेट महापालिकेच्या उद्यानासमोर दारू विक्री करण्यापर्यंत जाऊन पोहचली. उद्यानात असणाऱ्या सुरक्षा रक्षकाने याबाबत महापालिकेच्या अधिकाऱ्यांना माहिती दिली. तरी महापालिकेच्या अधिकाऱ्यांनी आपल्या उद्यानात काय सुरू आहे, याची दखल घेण्याची तसदी घेतली नसल्याचे समोर आले आहे.

उद्यानाच्या तिकीट घरासमोर सकळी 6 ते 9 वाजेपर्यंत गावठी दारू पिणाऱ्यांची मोठी गर्दी असते. याठिकानाहून दारू घेतल्यावर उद्यानाच्या बाहेर तलावालगतच्या मोकळ्या जागेवर दारुड्यांचा हैदोस सुरू असतो. उद्यान परिसरात प्लास्टिकचे प्याले आणि बाटल्या सर्वत्र पडलेल्या दिसतात. पोलीस आयुक्तांकडे तक्रार करूनही वडाळी परिसरातील अवैध धंदे खुलेआम सुरू राहत असल्याने आता तक्रार करावी तरी कुणाकडे असा प्रश्न परिसरातील रहिवाशांना पडला आहे. आता नव्याने रुजू झालेल्या पोलीस आयुक्त आरती सिंग वडाळी परिसरातील अवैध धंद्यांवर काही कारवाई करणार का याकडे सगळ्यांचे लक्ष लागले आहे.

हेही वाचा - अमरावतीत मंगळवारपासून 'माझे कुटुंब माझी जबाबदारी’ मोहीमेला सुरुवात