अमरावती - उत्तर प्रदेशातील लखीमपूर खीरी घटनेच्या निषेधार्थ महाविकास आघाडीने आज महाराष्ट्र बंदची हाक दिली होती. या पार्श्वभूमीवर अमरावती शहरात महाविकास आघाडीच्यावतीने मोर्चा काढण्यात आला होता. या मोर्चाच्या माध्यमातून काँग्रेस, राष्ट्रवादी काँग्रेस, शिवसेना आणि कम्युनिस्ट पार्टीच्या कार्यकर्त्यांनी व्यापाऱ्यांना आपली प्रतिष्ठाने बंद करण्याचे आवाहन केले. शहरात मोर्चा निघताच सकाळी सुरू झालेली बाजारपेठ अकरा वाजता पुन्हा बंद करण्यात आली.
राजकमल चौकातून निघाला मोर्चा -
सकाळी 10.33 वाजता अमरावती शहरातील राजकमल चौकातून महाविकास आघाडीचा मोर्चा निघाला. माजी मंत्री आणि काँग्रेस नेते डॉ. सुनील देशमुख, जिल्ह्याचे माजी खासदार आणि शिवसेना नेते अनंत गुढे, अमरावतीच्या आमदार सुलभा खोडके आणि राष्ट्रवादी काँग्रेसच्या नेत्या सुरेखा ठाकरे यांच्या नेतृत्वात मोर्चा काढण्यात आला. राजकमल चौक, श्याम चौक, जयस्तंभ चौक, जवाहरगेट , या परिसरात असणारी शहरातील मुख्य बाजारपेठ मोर्चाच्या माध्यमातून बंद करण्यात आली.
केंद्र सरकार विरोधात घोषणाबाजी-
