नवी दिल्ली : हिंडेनबर्ग रिसर्चने जानेवारी महिन्यात जारी केलेल्या अहवालानंतर अदानी समुह चांगलाच आर्थिक अडचणीत सापडला आहे. या अहवालानंतर समुहाच्या शेअर्समध्ये मोठ्या प्रमाणात घसरण झाली होती. आता अदानी समूहाने त्यांच्यावर असलेल्या कर्जाची परतफेड करण्यास सुरुवात केली आहे. समुहाने रविवारी सांगितले की, त्यांनी 31 मार्चच्या मुदतीपूर्वी घेतलेल्या 2.65 अब्ज डॉलर्सच्या कर्जाची परतफेड केली आहे. एका निवेदनात अदानी समूहाने म्हटले आहे की, त्यांनी समूहाच्या सूचीबद्ध कंपन्यांमधील शेअर्स गहाण ठेवून घेतलेल्या 2.15 बिलियन डॉलर्स कर्जाची परतफेड केली आहे. तसेच त्यांनी अंबुजा सिमेंट्सच्या अधिग्रहणासाठी घेतलेले 500 दशलक्ष डॉलर्सचे कर्ज देखील फेडले आहे.
मुदतीच्या आत परतफेड : अदानी समूहाने कर्जाची परतफेड करण्यासाठी निधीचा स्रोत उघड केला नसला तरी, प्रवर्तकांनी चार सूचीबद्ध कंपन्यांमधील अल्पसंख्याक भागभांडवल यूएस-आधारित जीक्युजी भागीदारांना 15,446 कोटी रुपयांना विकल्याच्या काही दिवसांतच हे समोर आले आहे. अदानीने 31 मार्च 2023 च्या वचनबद्ध मुदतीपूर्वी 2.15 बिलियन डॉलर्सच्या मार्जिन लिंक्ड इक्विटी बॅक्ड फायनान्सिंगचे प्रीपेमेंट पूर्ण केले आहे. या व्यतिरिक्त अंबुजा अधिग्रहणासाठी वित्तपुरवठा करण्यासाठी घेतलेल्या 500 दशलक्ष डॉलर्सची परतफेड देखील केली आहे. प्रवर्तकांनी आता 6.6 बिलियन डॉलर्सच्या एकूण संपादन किंमतीपैकी अंबुजा आणि एसीसी मध्ये 2.6 अब्ज डॉलर्स गुंतवले आहेत.
शेअर्स गहाण ठेवले होते : 7 मार्च रोजी 7,374 कोटी रुपयांच्या शेअर-बॅक्ड फायनान्सिंगच्या प्रीपेमेंटच्या अंतिम घोषणेनंतर, अदानी ग्रुप कंपन्यांचे आणखी शेअर्स ग्रुपच्या आघाडीच्या फर्मने घेतलेल्या कर्जासाठी सुरक्षा म्हणून गहाण ठेवले होते. 8 मार्च रोजी, SBICap ट्रस्टीने स्टॉक एक्स्चेंजला दिलेल्या नोटीसमध्ये म्हटले होते की, अदानी ग्रीन एनर्जी लिमिटेडचे 0.99 टक्के शेअर्स कर्जदारांच्या फायद्यासाठी अदानी एंटरप्रायझेस लिमिटेडकडे गहाण ठेवले होते. तसेच अदानी ट्रान्समिशन लिमिटेडमधील अतिरिक्त 0.76 टक्के शेअर्स देखील बँकांकडे गहाण ठेवण्यात आले होते.
चार वर्षांत कर्ज दुप्पट : अदानी समूहाचे एकूण कर्ज गेल्या चार वर्षांत दुप्पट झाले आहे. 2024 मध्ये समुहाकडे सुमारे 2 अब्ज डॉलर्स किमतीचे विदेशी चलन परतफेडीसाठी येणार आहे. गेल्या महिन्यात गुंतवणूकदारांसमोर केलेल्या सादरीकरणानुसार, समूहाचे 2019 मध्ये 1.11 लाख कोटी रुपये असणारे एकूण कर्ज 2023 मध्ये 2.21 लाख कोटी रुपयांपर्यंत वाढणार आहे. रोख रक्कम जोडल्यानंतर 2023 मध्ये निव्वळ कर्ज 1.89 लाख कोटी रुपये होईल.
हेही वाचा : Silicon Valley Bank Collapse : सिलिकॉन व्हॅली बँक बंद होण्याचे कारण जाणून घ्या
