नवी दिल्ली - केंद्र सरकारने भारत पेट्रोलियम कॉर्पोरेशनच्या खासगीकरणाची पूर्ण तयारी केली असल्याने कंपनीच्या शेअरला आज फटका बसला. मुंबई शेअर बाजारात कंपनीचे शेअर ३.५७ टक्क्यांनी घसरले आहेत.
मुंबई शेअर बाजारात बीपीसीएलचे शेअर ३.५३ टक्क्यांनी घसरून ४९७ रुपये झाले आहेत. तर निफ्टीत सरकारी कंपनीचा शेअर (पीएसयू) ३.२१ टक्क्यांनी घसरून प्रति शेअर ४९९ रुपये झाला आहे. केंद्र सरकारने बीपीसीएलच्या राष्ट्रीयकरणाचा कायदाच रद्द केला आहे. यापूर्वी केंद्र सरकारने बीपीसीएलच्या खासगीकरणाच्या प्रस्ताव तयार केला आहे. राष्ट्रीयकरण रद्द झाल्याने कंपनीची मालत्ता खासगी अथवा विदेशी कंपन्यांना विकण्यासाठी सरकारला संसदेच्या मंजुरीची आवश्यकता लागणार नाही.
केंद्र सरकार बीपीसीएलमधील ५३.३ टक्के हिस्सा विकणार आहे. बीपीसीएलचे मुंबई, कोची (केरळ), बिना (मध्यप्रदेश), नुमालीगढ(आसाम) येथे तेलशुद्धीकरण केंद्र आहेत. तर बीपीसीएलचे देशात १५ हजार ७८ पेट्रोल पंप आहेत. तर ६ हजार ४ एलपीजी वितरक आहेत.
हेही वाचा-भारत पेट्रोलियमच्या राष्ट्रीयकरणाचा कायदा रद्द; सरकारकडून संपूर्ण खासगीकरणाची तयारी
सौदी अरेबियाची कंपनी अ‌ॅराम्कोसह फ्रान्सची उर्जा क्षेत्रातील बलाढ्य कंपनी टोटल एसएकडून कंपनीला आकर्षक ऑफर मिळण्याची शक्यता आहे. कारण या दोन्ही कंपन्यांना सर्वात अधिक वेगाने वाढणाऱ्या भारताच्या किरकोळ इंधनाच्या बाजारपेठेत उतरण्यासाठी रस आहे.
हेही वाचा-पीएमसी बँक घोटाळा : जॉय थॉमसची पोलीस कोठडीत रवानगी; बँक खाती गोठविली
बीपीसीएलसह इतर सरकारी कंपन्यांमधील हिस्सेदारी विकण्याचा प्रस्ताव केंद्रीय मंत्रिमंडळासमोर नोव्हेंबरअखेर येण्याची शक्यता आहे.
