नवी दिल्ली - भारत-चीनमध्ये आजपासून तीन दिवसांच्या रणनीतीपूर्ण आर्थिक संवादाची सुरुवात झाली आहे. संवादाच्या चर्चेच्या सहाव्या फेरीदरम्यान पायाभूत क्षेत्र, उर्जा आणि औषधी उत्पादने या क्षेत्रांवर चर्चा करण्यात येणार आहे.
चीन व भारतामध्ये संयुक्तपणे स्थापन झालेल्या पायाभूत, उर्जा, उच्च तंत्रज्ञान, स्त्रोतांचे संवर्धन या विषयांवरील गटामध्ये संवाद होणार आहे.
भारताच्या बाजूने नीती आयोगाचे चेअरमन तर चीनच्या बाजूने राष्ट्रीय विकास आणि सुधारणा आयोगाचे (एनडीआरसी) चेअरमन हे त्यांच्या गटांचे नेतृत्व करणार आहेत. दोन्ही देशांचे उद्योग प्रतिनिधी, धोरणकर्ते आणि तज्ज्ञदेखील चर्चेत सहभागी होणार आहेत. अशा प्रकारचा द्विपक्षीय संवाद वर्षातून एकदा दिल्ली अथवा बीजिंगमध्ये होत असतो.
हेही वाचा-देशाची अर्थव्यवस्था ५ लाख कोटी डॉलरची करण्याकरिता 'हा' ठरू शकतो मास्टरस्ट्रोक
दोन्ही देशांच्या नोव्हेंबर २०१२ मधील बैठकीत ५ संयुक्त कार्य समुहांची स्थापना करण्याचा निर्णय घेण्यात आला होता. दोन्ही देशाचे वरिष्ठ प्रतिनिधी हे चांगल्या कल्पनांची देवाण-घेवाण करणार आहेत. क्षेत्रनिहाय आव्हाने व संधीबाबत चर्चा करणार आहेत. यामधून दोन्ही देशांमध्ये उद्योगानुकलतेसाठी सुविधा, द्विपक्षीय व्यापार आणि गुंतवणुकीचा ओघ वाढेल अशी अपेक्षा करण्यात येत आहे.
हेही वाचा-हुवाईचा ५ जी मध्ये समावेश करताना योग्य विचार करायला हवा
