मुंबई - लोकांना उत्कृष्ट होण्याकरिता नेतृत्वाने प्रेरित करावे, त्यांना खचवू नये, असे मत टाटाचे वरिष्ठ अधिकारी वनमाली अग्रवाल यांनी व्यक्त केले. ते जागतिक हिंदू आर्थिक मंचाच्या कार्यक्रमात बोलत होते.
वनमाली अग्रवाल हे टाटा ग्रुपमधील पायाभूत, संरक्षण आणि अंतराळविश्वचे अध्यक्ष आहेत. ते म्हणाले, उद्योगामधून पुरेसा नफा मिळवून तो नवसंशोधन आणि प्रगतीसाठी गुंतवणुकीसाठी वापरायला हवा. हे जेवढे महत्त्वाचे आहे, तेवढेच लोकांना सोबत घेणे महत्त्वाचे आहे.
हेही वाचा-एमएसएमईची बहुतांश थकित रक्कम अदा - निर्मला सीतारामन
संस्थेमधील सर्व पातळीवरील लोकांनी एकनिष्ठ आणि बांधिलकीने काम करण्याची गरज त्यांनी अधोरेखित केली. नेतृत्व म्हणजे जगभरातून केवळ स्वप्ने घेणारी ड्रीम टीम नाही, तर अस्तित्वात असलेल्या मनुष्यबळातून उत्कृष्ट असे मनुष्यबळ घेणे आहे. पुढे ते म्हणाले, भारत जगामध्ये नवसंशोधनासाठी मोठे केंद्र ठरू शकते. तसेच तळातील समस्या सोडविण्यासाठी कमी खर्चातील उपाय भारत विकसित करू शकतो.
हेही वाचा-सरकार अन् उद्योगपतींमध्ये अविश्वास वाढत आहे - उद्योगपती अजय पिरामल
भारतीय तरुणांसारखी जगात कोणत्याही देशाकडे आकलन आणि बौद्धिक क्षमता नाही. भारत हे नवसंशोधनाचे कोठार आहे. मात्र बहुराष्ट्रीय कंपन्यांकडून भारती तरुणांचे बहुतेक वेळी शोषण होत असल्याची भावना त्यांनी व्यक्त केली. बहुराष्ट्रीय कंपन्या भारतीयांचे कौशल्य वापरून कमी खर्चात उपाय विकसित करतात. त्यातून मोठा पैसा गोळा करतात. सध्याच्या मनुष्यबळाला पुन्हा कुशल करण्याची गरजही त्यांनी कार्यक्रमात व्यक्त केली.
अजय पिरामल यांनी व्यक्त केली आहे चिंता-
विविध सरकारी अंमलबजावणी संस्थांकडून कॉर्पोरेटवर छापे, झडती आणि लूकआउट नोटीस देण्यासारखे कारवाईचे प्रकार वाढले आहेत. अशा प्रकारामुळे उद्योजक समुदाय आणि सरकारमध्ये अविश्वास वाढत असल्याचे उद्योगपती अजय पिरामल यांनी सांगितले. ते वर्ल्ड हिंदू इकॉनॉमिक फोरममध्ये बोलत होते.
