नवी दिल्ली - चारचाकीचे स्वप्न पाहणाऱ्यांसाठी काहीशी निराशाजनक बातमी आहे. फोक्सवॅगन इंडियाचे मॉडेल पोलो आणि व्हेंटोच्या किमती १ जानेवारीपासून वाढणार आहेत. या किमती २.५ टक्क्यांनी वाढणार असल्याचे कंपनीने म्हटले आहे.
उत्पादनाचा खर्च वाढल्याने फोक्सवॅगनच्या किमती वाढविण्यात आल्याचे कंपनीने म्हटले आहे. फोक्सवॅगन पॅसेंजर कार्स इंडियाचे प्रवक्ते म्हणाले की, जानेवारी २०२१ पासून फोक्सवॅगन इंडियाने वाहनाच्या किमती वाढविण्याचा निर्णय घेतला आहे. नुकतेच मारुती सुझुकीसह इतर कंपन्यांनीही वाहनांच्या किमती जानेवारी २०२१ पासून वाढविण्याचा निर्णय घेतला आहे.
बीएमडब्ल्यू ग्रुप इंडियाच्या वाहनांच्या किमती २ टक्क्यापर्यंत वाढणार आहेत. बीएमडब्ल्यू आणि सर्व मिनी मॉडेलचे दर हे ३ जानेवारी २०२१ पासून वाढणार आहेत. निस्सान वाहनांच्या किमती ५ टक्क्यापर्यंत वाढणार आहेत.
गतवर्षी ऑस्ट्रेलियन न्यायालयाने ठोठावला होता कंपनीला दंड
फोक्सवॅगनला ऑस्ट्रेलियन न्यायालयाने ८.६ कोटी अमेरिकन डॉलरचा (सुमारे ६१२ कोटी रुपये) दंड ठोठावला आहे. डिझेलवर चालणाऱ्या चारचाकीमधून उत्सर्जन होण्याचे प्रमाण दाखविताना छेडछाड केल्याचा कंपनीवर आरोप आहे.
डिफिट डिव्हाईसमधून ग्राहकांची फसवणूक-
कंपनीकडून प्रदूषणाच्या आकडेवारीत 'छेडछाड' होत असलेला प्रकार २०१५ मध्ये उघडकीस आला होता. तेव्हापासून फोक्सवॅगनला १० अब्ज डॉलर रुपये दंड विविध देशांमध्ये भरावा लागला आहे. कंपनीने जगभरातील १ कोटी १० लाख चारचाकींमध्ये 'डिफिट डिव्हाईस' हे सॉफ्टवेअर साधन बसविण्यात आल्याचे मानण्यात येते. यामधील ५७ हजार चारचाकी ऑस्ट्रेलियामधून २०११ ते २०१५ मधून निर्यात करण्यात आल्या होत्या.
