मुंबई - एका छताखाली मुंबई महानगर प्रदेशातील मालमत्तेचे विविध पर्याय इच्छुक घर खरेदीदारांना उपलब्ध व्हावेत यासाठी बांधकाम क्षेत्रातील विविध संघटनाकडून मालमत्ता प्रदर्शन भरविले जातात. पण कोरोनाने या प्रदर्शनांना ब्रेक लागला आहे. असे असताना एमसीएचआय-क्रेडाईने मात्र यावर व्हर्च्युअल रिअल इस्टेट एक्स्पो अर्थात ऑनलाइन मालमत्ता प्रदर्शनाचा मार्ग शोधून काढला आहे. देशातील पहिले असे ऑनलाइन मालमत्ता प्रदर्शन एमसीएचआय-क्रेडाईने उद्यापासून 14 डिसेंबरपर्यंत भरविणार आहे.
ग्राहकांना घर खरेदी करायचे म्हणजे ब्रोकर, दलालाला गाठा, नाही तर त्यांची कार्यालये शोधत फिरा अशा गोष्टींना गेल्या काही वर्षांत छेद जाताना दिसत आहे. कारण आज थेट बिल्डरांकडून घरखरेदी करण्यासाठी विविध पर्याय उपलब्ध झाले आहेत. त्यातीलच एक पर्याय म्हणजे मालमत्ता प्रदर्शनाचा आहे.
...म्हणून गृहप्रकल्पांच्या प्रदर्शनाला वाढता प्रतिसाद
बांधकाम क्षेत्रातील विविध संघटना गेल्या काही वर्षापासून सातत्याने असे प्रदर्शन भरवत आहेत. त्याला मिळणारा प्रतिसाद पाहता मागील दहा-बारा वर्षात अशा प्रदर्शनाचे प्रमाण खूपच वाढले आहे. वर्षातून सात-आठ प्रदर्शने मुंबई महानगर प्रदेशात भरताना दिसतात. महत्त्वाचे या प्रदर्शनात गृहकर्जही उपलब्ध करून दिले जातो. तसेच विविध सवलतींचा लाभ येथे मिळत असल्याने याला भरघोस प्रतिसाद मिळतो. पण कोरोनाचा कहर सुरु झाल्यापासून अशा प्रदर्शनाला ब्रेक लागला आहे. कोरोनामुळे अशा कार्यक्रमावर बंदी आली आहे. मोठ्या संख्येने प्रदर्शनात सहभागी होत असल्याने खबरदारी म्हणून अशा कार्यक्रमावर बंदी आहे.
हेही वाचा-फ्लिपकार्टपासून विलग होत फोनपे होणार स्वतंत्र कंपनी; 5,172 कोटींचे भांडवल तयार
100 बिल्डर प्रदर्शनात प्रकल्पासह होणार सहभागी
मालमत्ता प्रदर्शन हे मालमत्ता बाजारपेठेसाठी अत्यंत महत्त्वाचे मानले जाते. यात लाखो घरे विकली जातात. तसेच कोट्यवधींची उलाढाल होते. अशावेळी कोरोनामुळे प्रदर्शनाला ब्रेक लागल्याने बिल्डरांचा घरविक्रीसाठी ग्राहकांपर्यंत पोहचोण्याचा पर्याय बंद झाला होता. उद्यापासून 14 डिसेंबरपर्यंत ऑनलाइन प्रदर्शनाला सुरुवात होत आहे. मुंबई महानगर प्रदेशातील (एमएमआर) मालमत्ता येथे विकीस उपलब्ध करून दिल्या जाणार आहेत. या एमएमआरमधील 100 बिल्डर आपल्या प्रकल्पासह सहभागी होणार आहेत.
हेही वाचा-नवीन क्रेडिट कार्ड लाँच करण्यावर आरबीआयचे एचडीएफसी बँकेवर निर्बंध
असे होता येणार सहभागी-
- आयोजकांकडून एक लिंक दिली जाईल.
- या लिंकवर जाऊन व्हर्च्युअल टूरच्या माध्यमातून सर्व प्रकल्पाची माहिती मिळविता येणार आहे.
- यातून आपल्या आवडीचे परवडणारे घर खरेदी करता येणार आहे.
- व्हिडीओ कॉन्फरन्सिंगद्वारे आपल्या सर्व प्रश्नांची उत्तरेही मिळवता येणार आहेत.
- त्याचवेळी एसबीआय बँककडून गृहकर्जही उपलब्ध करून दिले जाणार आहे.
या ऑनलाइन प्रदर्शनाला अधिकाधिक संख्येने इच्छुकांनी भेट द्यावी, क्रेडाई-एमसीएचआयचे अध्यक्ष दीपक गोरडीया असे आवाहन केले आहे. आपल्या हक्काच्या घराचे स्वप्न पूर्ण करावे, असेही त्यांनी म्हटले आहे.
