नवी दिल्ली - ठराविक ग्राहकांना सेवेत प्राधान्य देणारा प्लॅन सुरू ठेवल्याने दूरसंचार नियामक प्राधिकरणाने (ट्राय) व्होडाफोन आयडियाला कारणे दाखवा नोटीस बजावली आहे. व्होडाफोनच्या रेडएक्स टॅरिफमध्ये पारदर्शकतेचा अभाव, दिशाभूल होते. त्यामधून नियामक संस्थेच्या तत्वांचे पालन होत नसल्याचे ट्रायने नोटीसमध्ये म्हटले आहे.
ट्रायने व्होडाफोन आयडियाला ३१ ऑगस्टपर्यंत 'कारणे दाखवा' नोटीसचे उत्तर देण्याचे आदेश दिले आहेत. नियामक संस्थेच्या नियमांचे उल्लंघन केल्या प्रकरणात योग्य कारवाई का करू नये, अशी ट्रायने व्होडाफोन आयडियाला विचारणा केली आहे. व्होडाफोन आयडियाने ४ नेटवर्क हे प्राधान्याने आणि वेगवान देण्याचा केलेला दावा हा नियमांचे पालन करत नाही, असे ट्रायने नोटीसमध्ये म्हटले आहे.
भारती एअरटेलने ठराविक ग्राहकांना प्राधान्याने सेवा देण्याचा प्लॅन सुरू केला आहे. मात्र, एअरटेलने ट्रायच्या नियमांचे पालन करण्याची तयारी दर्शविली आहे. तसेच स्वत:हून प्लॅटिनियम प्लॅनमध्ये योग्य बदल केला आहे. त्यामुळे ट्रायने भारती एअरटेलला कारणे दाखवाची नोटीस दिली नसल्याचे सूत्राने सांगितले.
गेल्या काही आठवड्यांपासून ट्राय हे व्होडाफोन आयडियाच्या रेडएक्स आणि भारती एअरटेलच्या प्लॅटिनियमच्या प्लॅनची चौकशी करत आहे. या प्लॅनमध्ये इतर ग्राहकांची सेवा विस्कळित होते, असा ट्रायने आक्षेप घेतला आहे.
