नवी दिल्ली - दक्षिण कोरियन गेमिंग कंपनी 'पब्जी'ने देशात पुन्हा पब्जी सुरू करण्यासाठी सरकारची परवानगी मिळण्यासाठी पावले उचलण्यास सुरुवात केली आहे. चिनी कंपनी टेन्सेंटला पब्जीचे भारतात वितरण करण्याचे अधिकार पब्जी कंपनीने काढून घेतले आहेत.
नुकत्याच घडलेल्या विविध घटनानंतर पब्जी कॉर्पोरेशनने टेन्सेंट इंडियाला भारतात दिलेली पब्जी मोबाईलची फ्रँचाईजी रद्द करण्याचा निर्णय घेतला आहे. पब्जी कॉर्पोरेशनकडे पब्जीचे भारतामधील सर्वाधिकार राहणार असल्याचे कंपनीने म्हटले आहे. खासगी गोपनीयता आणि सुरक्षितता यासाठी भारत सरकारने केलेल्या उपाययोजना पब्जी कॉर्पोरेशन समजू शकते. कंपनी खासगी डाटा सुरक्षित ठेवण्याला प्राधान्य देते, असा पब्जीने दावा केला आहे. तर टेन्सेंट कंपनीने प्रतिक्रिया दिलेली नाही. सर्व नियम व कायद्यांचे पालन करून देशात पुन्हा गेमिंग सुरू करण्यासाठी सरकारबरोबर काम करणार असल्याचेही पब्जीने म्हटले आहे.
हेही वाचा-स्टेट बँक ऑफ इंडिया देणार १४ हजार नोकऱ्या; कर्मचाऱ्यांना देणार स्वेच्छानिवृत्ती
पब्जी मोबाईल हे प्लेयर अननोअन बॅटलग्राऊंड्स (पीयूबीजी) या गेमचे मोबाईल व्हर्जन आहे. या गेमची मालकी दक्षिण कोरियाच्या पब्जी कॉर्पोरेशनकडे आहे. तर, भारतामध्ये पब्जीच्या वितरणाचे अधिकार टेन्सेंटकडे होते. पब्जीचे जगात सर्वाधिक डाऊनलोडिंग भारतामध्ये होते. हे गेमिंग अॅप बंद राहिल्यानंतर कंपनीला मोठा आर्थिक फटका बसला आहे.
हेही वाचा-सिल्व्हर लेक जिओपाठोपाठ 'रिलायन्स रिटेल'मध्ये करणार ७,५०० कोटींची गुंतवणूक
केंद्र सरकारने देशाची सार्वभौम, एकता आणि देशाच्या सुरक्षेसाठी आठवडाभरापूर्वी ११८ अॅपवर बंदी लागू केली आहे. पब्जीवर बंदी लागू होताच बंगळुरूमधील कंपनीने एफएयूजी हे मल्टीप्लेयर गेम लाँच केला आहे. यामधून मिळणारा २० टक्के महसूल भारतीय सैन्यदलाला देण्याचेही कंपनीने जाहीर केले आहे.
