मुंबई- तुम्ही हक्काच्या घराचे स्वप्न पूर्ण करण्याचा विचार जर पक्का केला असेल तर तुमच्यासाठी ही बातमी महत्वाची आहे. एक रुपयाही मुद्रांक शुल्क न भरता तुम्हाला घर खरेदी करता येणार आहे. ही योजना बांधकाम व्यावसायिक संघटना नरेडेकोने (NAREDCO) जाहीर केली आहे.
राज्य सरकारने मुद्रांक शुल्क 31 डिसेंबरपर्यंत 2 टक्के केले आहे. नरेडेकोच्या ठराविक प्रकल्पात घरखरेदी करणाऱ्या ग्राहकांना 31 डिसेंबर 2020 पर्यंत मुद्रांक शुल्कावर पूर्णतः सवलत जाहीर करण्यात आली आहे. त्यामुळे ग्राहकांना भरावा लागणाऱ्या 2 टक्के मुद्रांक शुल्काची रक्कम नरेडेकोच भरणार आहे.
कोरोना आणि टाळेबंदीने बांधकाम व्यवसायाचे कंबरडे मोडले आहे. घर खरेदी-विक्रीत मोठी घट झाली आहे. या पार्श्वभूमीवर बांधकाम व्यवसायाला आणि ग्राहकांना दिलासा देण्यासाठी राज्य सरकारने 1 सप्टेंबर ते 31 डिसेंबर 2020 पर्यंत 5 टक्क्यांऐवजी 2 टक्के मुद्रांक शुल्क लागू करण्याचा निर्णय घेतला आहे. तर 1 जानेवारी ते 31 मार्च 2021 पर्यंत 5 टक्क्यांऐवजी 3 टक्के मुद्रांक शुल्क आकारण्याचा निर्णय घेतला आहे. त्यानुसार या निर्णयाची अंमलबजावणी सुरू झाली आहे. हा निर्णय दिलासा देणारा असतानाचे ग्राहकांना मोठ्या संख्येने प्रकल्पाकडे आकर्षित करण्यासाठी बिल्डरांची आघाडीची नरेडेको संघटना पुढे सरसावली आहे.
हेही वाचा-व्होडाफोन उभारणार २५ हजार कोटींचा निधी; संचालक मंडळाची मंजुरी
31 डिसेंबरपर्यंत सदस्यांच्या 1 हजार प्रकल्पात घर खरेदी केल्यानंतर शून्य टक्के मुद्रांक शुल्क आकारण्यात येणार असल्याचे नरेडेको संघटनेचे (पश्चिम) अध्यक्ष राजन बांदीलकर यांनी सांगितले. पुढे ते म्हणाले, की मुद्रांक शुल्क कमी करण्याचा सरकारने धाडसी निर्णय घेतला आहे. शून्य टक्के मुद्रांक शुल्कात घर खरेदी करणे शक्य होणार आहे. बँकेच्या व्याजाचा दरही कमी आहे. त्यामुळे ग्राहकांना विनंती आहे, की त्यांनी स्वप्नातील घर पाहून घ्यावे. योजनेचा लाभ घ्यावा, असे आवाहन बांदीलकर यांनी केले. मुंबई, पुणे आणि नाशिकसारख्या शहरातील प्रकल्पाचाही सहभाग आहे. त्यामुळे ही सवलत योजना घर खरेदी करणाऱ्या ग्राहकांसाठी फायद्याची आहे.
हेही वाचा-तुम्हाला युपीआयवरील आर्थिक व्यवहार मोफत आहेत की नाहीत? जाणून घ्या, सविस्तर माहिती
