कोलकाता - कर्जाची मागणी घटल्याचे स्टेट बँक ऑफ इंडियाचे चेअरमन रजनीश कुमार यांनी म्हटले आहे. अशा स्थितीत देशाच्या अर्थव्यवस्थेला चालना देण्याची गरजही त्यांनी व्यक्त केली. रजनीश कुमार हे बँकांच्या विविध शाखांशी चर्चा करण्यासाठी शहरात आले होते. यावेळी त्यांनी माध्यमांशी बोलताना हे मत व्यक्त केले.
अर्थव्यवस्थेतील कर्जाची मागणी कमी झाली आहे. सरकारी बँकांकडून पुरेसा पतपुरवठा होऊ शकत नाही. तसेच त्यांच्याकडे पुरेसे भांडवलही नाही. चांगला मान्सून झाल्यास सकारात्मक परिणाम होईल, असा विश्वास स्टेट बँक ऑफ इंडियाचे चेअरमन रजनीश कुमार यांनी व्यक्त केला. सरकारकडून होणारा खर्च वाढल्याने आणि येणारे सण यामुळे मागणी वाढेल, असेही ते म्हणाले.
जीडीपीत भारताची झाली आहे घसरण -
केंद्र सरकारने चालू वर्षात ३ लाख कोटी डॉलरची अर्थव्यवस्था करण्याचे उद्दिष्ट निश्चित केले आहे. अशा स्थितीमध्ये जागतिक बँकेच्या जीडीपीच्या मानांकनात भारताची १ अंकाने घसरण झाली आहे. जागतिक बँकेच्या राष्ट्रीय सकल उत्पादन मानांकन २०१८ (जीडीपी मानांकन) यामध्ये भारत सातव्या क्रमांकावर पोहोचला आहे. वाहन उद्योग हे सध्या मंदीमधून जात असल्याने अनेकांनी नोकऱ्याही गमावल्या आहेत.
