सातारा - कोल्हापूर, सांगली, सातारा क्षेत्रातील लघु पाटबंधारे तलाव, डोंगर माथ्यावरील पाझर तलाव तसेच हजारो शेतकऱ्यांच्या शेतात शेततळी झाल्यास कमीतकमी 25 ते 30 टीएमसी पाणी साठवणूक होवू शकेल व पावसाच्या दिवसात धरणे ओव्हर फ्लो झाल्यानंतर येणारी पूरपरिस्थिती बऱ्याच प्रमाणात आटोक्यात येईल, असा विश्वास माजी मंत्री विक्रमसिंह पाटणकर यांनी त्यांच्या निवासस्थानी आयोजित केलेल्या पत्रकार परिषदेत व्यक्त केला.
कराड, सांगली आणि कोल्हापूर या शहरातील महापुराचा धोका टाळण्यासाठी सह्याद्रीच्या डोंगरमाथ्यावरील अनेक लघुपाटबंधारे तलावाची अपूर्ण कामे पूर्ण होणे आवश्यक आहे. सह्याद्रीच्या डोंगरमाथ्यावर हजारो शेततळ्यांची नवीन साईट्‌स उपलब्ध आहेत. त्या क्षेत्रात पाणी साठवल्यास मोठ्या प्रमाणावर पावसाचे पाणी साठून राहील. या पाण्यावर अभयारण्याच्या भोवतालची अनेक गावे बागायत क्षेत्रात रुपांतरित होवून हजारो एकर क्षेत्र बारामाही पाण्याखाली येईल, असेही ते म्हणाले.
माजी मंत्री पाटणकर पुढे म्हणाले, एकट्या पाटण तालुक्यात डोंगरमाथ्यावरील सर्व शेतकऱ्यांना मागेल त्याला शेततळे ही योजना राबवून मोठ्या प्रमाणावर पाणी अडविले जाईल. या साठविलेल्या पाण्याचा वापर करून स्थानिक शेतकऱ्यांची कोरडवाहू जमीन बागायत होईल. डोंगरमाथ्यावरील अनेक गावातील शेतकऱ्यांची हजारो एकर शेती पाण्याखाली आल्याने त्यांचे जीवन समृद्ध होईल. पावसावर अवलंबून असणाऱ्या शेतीवर पोटभरत नसल्याने पोट भरण्यासाठी मुंबई, पुणे या औद्योगिक नगरीकडे धावणारा शेतकरी वर्ग गावाकडे थांबून या अडविलेल्या पाण्यावर नवीन बागायत क्षेत्र निर्माण करून तो आपली शेती समृद्ध करू शकेल. त्यामुळे मोठ्या शहरात होणारा दाट लोकवस्तीचा प्रश्न सुटेल.
कोयना परिसर, उरमोडी, तारळी, उत्तरमांड, निवकणे, वांगमराठवाडी, चांदोली, काळम्मवाडी व तसेच कोल्हापूर, सांगली आणि सातारा येथील क्षेत्रात लघुपाटबंधारे तलाव आणि डोंगरमाथ्यावरील शेतकऱ्यांच्या शेतात शेततळी निर्माण झाल्यास किमान 25 ते 30 टीएमसी अंदाजे पाणी साठवण होवू शकेल आणि पावसाच्या दिवसात धरणे ओव्हरफ्लो झाल्यांनतर येणारी पूरपरिस्थिती बऱ्याच प्रमाणात कमी होईल, असे पाटणकर म्हणाले.
त्याचबरोबर, डोंगरमाथ्यावर भरपूर पाऊस पडूनही तेथील शेतकऱ्यांच्या शेतीचे उत्पन्न वाढत नाही. त्याठिकाणी पडलेले पाणी शेत तळ्यात साठवण केल्यास फळबाग व बागायत शेती निर्माण होवून वनशेतीचा प्रयोग सुद्धा यशस्वी होईल. शासनाने सर्व शक्तीनुसार प्रयत्न केल्यास पुढील तीन वर्षात ही सर्व कामे मार्गी लागतील. शासनाच्या या खात्याने काम कारावयाचे की त्या खात्याने काम करावयाचे यावर चर्चा करत बसण्यापेक्षा आपल्या कृतीवर भर दिला पाहिजे. यासाठी शासनाचे विभाग व स्थानिक जनता या सर्वांनी मिळून ही कामे केली तर महापुराचे संकटसुद्धा दूर होईल असा सल्ला देखील पाटणकर यांनी दिला.
तसेच, डोंगरदऱ्यातील शेतकऱ्यांना नवीन बागायत क्षेत्राताले पाणी उपलब्ध होईल. नदीतील पाणी उपसण्यापेक्षा डोंगर माथ्यावर पाणी साठवण करून ते पाणी ग्रॅव्हीटीने शेतकऱ्यांच्या शेतापर्यंत पोहोचेल. यामुळे विजेचीही बचत होईल. शेतकऱ्यांचे उत्पादन वाढले. पोट भरण्यासाठी त्यांना मुंबई, पुण्याला जावे लागणार नाही. यासाठी पुन्हा एकदा पूर्ण शक्तीने या योजना राबविणे आवश्यक आहे. या योजना राबविण्यासाठी जलसंपदा विभागाने पुढाकार घ्यावा, असेही माजी मंत्री पाटणकर यांनी पत्रकार परिषदेत म्हटले.
