नाशिक - 'नो कोशाहरी नो वोट'चा नारा देत नाशिक जिल्ह्यातील पेन्शनधारक मोदींच्या सभेत गांधीगिरी पद्धतीने आंदोलन करणार आहेत. पेन्शनधारकांच्या मागण्यांकडे दुर्लक्ष का होत आहे? असा थेट प्रश्न पंतप्रधान मोदींना यावेळी विचारणार असल्याचे पेन्शन संघटना नाशिक जिल्हा अध्यक्ष हरिचंद्र गुजराती यांनी सांगितले. आमच्या मागण्या सरकार दरबारी समजून न घेतल्याने आता थेट पंतप्रधानांना न्याय मागणार असल्याचेही त्यांनी सांगितले.
गेल्या अनेक वर्षांपासून पेन्शनधारक सरकारकडे आपल्या मागण्या मान्य करा म्हणून विनंती करत आहेत. मात्र, अजून सरकार याकडे दुर्लक्ष करत आहे. नाशिक जिल्ह्यात जवळपास सव्वा लाखाच्यावरती विविध क्षेत्रातील पेन्शनधारक आहेत. काहींची तर अतिशय बिकट अवस्था झाली आहे. वयोवृद्ध झाल्याने कुठेही काम करता येत नाही. अवघ्‍या पंधराशे ते दोन हजार इतक्या मोजक्या पेन्शनवर घर कसे चालवायचे हा मोठा प्रश्न त्यांच्यासमोर आहे.
मंत्री, अधिकारी आश्वासन देऊन मोकळे होतात. देशातील सर्वच पेन्शनधारकांनी अनेकवेळा आंदोलने केली. मात्र, त्यांच्या हातात काहीच पडले नाही. त्यामुळे पुन्हा एकदा या सरकार बापाने आमच्याकडे लक्ष द्यावे म्हणून आठवण करून देण्यासाठी नाशिकमधील पिंपळगाव येथे होणाऱ्या नरेंद्र मोदींच्या सभेत गांधीगिरी मार्गाने आंदोलन करणार असल्याचे हरिचंद्र गुजराती यांनी सांगितले.
भाजप सरकारने सत्तेत येण्यापूर्वी 2014 च्या निवडणुकीत 95 पेन्शनधारकांना भगतसिंग कोशाहरी अहवालानुसार दरमहा 3 हजार आणि अधिक महागाई भत्ता देण्याचे आश्वासन दिले होते. तसेच सत्तेत येताच तीन महिन्यात पेन्शनमध्ये वाढ करण्याचेही आश्वासन दिले होते. मात्र, या दोन्ही आश्वासनांचा भाजप व पंतप्रधान नरेंद्र मोदी यांना विसर पडला आहे. जर या सरकारने लक्षच दिले नाही तर येत्या लोकसभा निवडणुकीत 'नो कोशाहारी नो वोट' असा नारा देत सत्ताधारी पक्षाला देशातील एकही पेन्शनधारक मतदान करणार नसल्याचा निर्णय सर्वच पेन्शनधारकांकडून घेण्यात आला आहे.
मात्र, मोदींच्या सभेत हे आंदोलन पोलीस यंत्रणा कितपत यशस्वी होऊ देते, की आंदोलन गुंडाळले जाते हे बघणे महत्त्वाचे ठरणार आहे.
