नागपूर : नागपुरात शुक्रवारी सायंकाळी वेलट्रीट रुग्णलयाला आग लागल्याची गंभीर घटना घडली. यात तिघांचा मृत्यू झाला आहे. त्यामुळे याप्रकरणी वंचित बहुजन आघाडीने या रुग्णालयासमोर आंदोलन केले. तसेच डॉक्टर व संचालकांवर कारवाई करण्याची मागणी केली.
डॉक्टर-संचालकांवर राजकीय आशीर्वाद
नागपूरच्या वाडी परिसरात वेलट्रीट हॉस्पिटल आहे. याला काल (शुक्रवार) अचानक आग लागली. त्यामुळे या रुग्णालयाच्या संचालक आणि डॉक्टरवर कारवाई झाली पाहिजे, या मागणीसाठी वंचित बहुजन आघाडीकडून हातात फलक घेऊन आंदोलन करण्यात आले. या डॉक्टरांवर राजकीय आशिर्वाद असल्याने कारवाईस टाळाटाळ होत आहे, असा आरोप वंचित बहुजन आघाडीच्या आंदोलनकर्त्यांनी केला आहे.
रुग्णालय बंद करण्याची मागणी
तसेच रुग्णालयापुढे उभे राहून या घटनेत मरण पावलेल्याना श्रद्धांजली वाहण्याचे फलक घेऊन निदर्शने करण्यात आले. यासोबतच घटनेचा निषेध करण्यासाठी घोषणाबाजी करण्यात आली. रुग्णालय बंद करा म्हणत डॉक्टरांवर कारवाई करण्याची मागणी करण्यात आली.
डॉक्टर -संचालकांवर काँग्रेसचा वरदहस्त?
या रुग्णलयाचे संचालक-डॉक्टरांवर काँग्रेसचे प्रदेशाध्यक्ष नाना पटोले यांचा आशिर्वाद आहे. असाही आरोप करण्यात आला. पोलीस काहीच कारवाई करत नसल्याचेही आंदोलकांनी म्हटले आहे.
