नांदेड जिल्ह्यात कोरोनाचा कहर कायम..! सोमवारी 70 बाधितांची भर, तर दोघांचा मृत्यू

नांदेडमध्ये कोरोनाची साखळी तोडण्यासाठी जिल्हा प्रशासनाकडून उपाययोजना करण्यात येत आहे, परंतु त्यानंतरही कोरोना बाधित रुग्णसंख्येचा आकडा वाढतच आहे. सद्यस्थितीत जिल्ह्यात एकूण रुग्णसंख्या 1 हजार 394 वर पोहचली आहे.

नांदेड- जिल्ह्यामध्ये कोरोना रुग्णांचा उद्रेक सुरूच असून रुग्णसंख्येत झपाट्याने वाढ होत आहे. वाढत्या बाधित रुग्णांच्या संख्येमुळे नांदेडकरांची चिंता वाढली आहे. मागील 24 तासांमध्ये तब्बल 70 रुग्ण आढळले असून दोघांचा मृत्यू झाला आहे.

नांदेडमध्ये कोरोनाची साखळी तोडण्यासाठी जिल्हा प्रशासनाकडून उपाययोजना करण्यात येत आहे, परंतु त्यानंतरही बाधित रुग्णसंख्येचा आकडा वाढतच आहे. सद्यस्थितीत जिल्ह्यात एकूण रुग्णसंख्या 1 हजार 394 वर पोहचली आहे. आज 47 रुग्ण कोरोनावर मात करून घरी परतले आहेत. तर एकूण मृत्यू झालेल्या रुग्णांची संख्या 59 एवढी झाली आहे.

आज प्राप्त झालेल्या 420 नमुने तपासणी अहवालापैकी पैकी 337 नमूने निगेटीव्ह आले आहेत व 70 नमून्यांचा अहवाल कोरोना पॉझिटीव्ह आला आहे. त्यामुळे जिल्ह्यात एकूण रुग्णसंख्या 1 हजार 394 झाली आहे. आजवर डिस्चार्ज झालेले रुग्ण 740 असून उपचार घेत असलेले रुग्ण हे 583 आहेत. प्रलंबित असलेल्या स्वॅबची संख्या 246 एवढी आहे. दररोज वाढत असलेल्या शहरी रुग्णांबरोबर ग्रामीण भागातही कोरोनाचा संसर्ग मोठ्या वेगाने होत असल्याने जिल्हा प्रशासन व आरोग्य विभागाच्या चिंतेत भर पडली आहे.