सोलापूर - बेकारीमुळे आर्थिक संकटात सापडलेल्या रिक्षाचालकांनी 10 हजार रुपये उदरनिर्वाह अनुदान देण्याची मागणी केली आहे. शहरातील 11 हजार रिक्षाचालकांनी व्यक्तीगतरित्या अर्ज करून जिल्हाधिकाऱ्यांकडे ही मागणी केली आहे. माकपचे नेते माजी आमदार नरसय्या आडम मास्तर यांच्या नेतृत्वाखाली रिक्षाचालकांच्या शिष्टमंडळाने सोलापूरचे जिल्हाधिकारी यांच्याकडे अर्ज सादर केले आहेत.
लॉकडाऊनच्या काळात मागील 3 महिन्यापेक्षा जास्त कालावधीमध्ये रिक्षा चालकांचा व्यवसाय बंद झालेला आहे. सोलापुरातील रिक्षाचालक बेकार व बेरोजगार झाल्याने उदरनिर्वाहाकरता 10 हजार रुपये अनुदान शासनामार्फत उपलब्ध करून देण्याची मागणी रिक्षाचालकांनी केली आहे. शहरातील 10 हजार 971 रिक्षा चालकांनी सोलापूरचे जिल्हाधिकारी मिलिंद शंभरकर यांच्याकडे व्यक्तीगत अर्ज सादर केले आहेत. ज्येष्ठ कामगार नेते व माजी आमदार नरसय्या आडम मास्तर यांच्या नेतृत्वाखाली शिष्टमंडळाने जिल्हाधिकाऱ्यांची भेट घेऊन मागणीचे अर्ज सादर केले आहेत. यामध्ये रिक्षाचालकांनी रिक्षा खरेदीकरता घेतलेले सरकारी, सहकारी, खासगी वित्तीय संस्थानांच्या कर्जावरील व्याज माफ करून रिक्षा चालकांचे कर्ज पुनर्गठीत करण्यात यावे, गेल्या तीन महिन्यांपासून ऑटोरिक्षा बंद असल्याने या ऑटोरिक्षाचा विमा, योग्यता प्रमाणपत्र नुतनीकरण, प्रदूषण प्रमाणपत्र नुतनीकरण, परवाना नुतनीकरण व वाहनाची आयुमर्यादा, एक वर्षाने वाढवून देण्यात यावी, आशा मागन्या करण्यात आल्या आहेत.
रिक्षाचालक-मालक यांच्याकरता कल्याणकारी मंडळाची स्थापना करून मंडळाद्वारे आरोग्य, शिक्षण, निवारा, वृद्धापकाळातील उदरनिर्वाहाकरता निर्वाह भत्ता मिळवून द्यावे, अशा मागण्या देखील करण्यात आल्या आहेत. यावेळी शिष्टमंडळात सिटूचे राज्य सचिव कॉ. सलीम मुल्ला, अंबिका पानगांटी, खलील कोरबू, आरिफ मणियार, अनिल मोरे, विजय फकरे, सैफन शेख, जहीर नदाफ, खुद्दस शेख आदी उपस्थित होते.
कठीण काळात रिक्षा चालकाला शासनाच्या मदतीची गरज - माजी आमदार नरसय्या आडम
संपूर्ण देशभरात कोविड-19 या साथीच्या रोगामुळे लॉकडाऊन, संचारबंदी जाहीर करण्यात आली. जवळपास 3 महिन्यापासून रिक्षा चालकांचा व्यवसाय ठप्प झाला आहे. शासनाच्या व परिवहन विभागाच्या विविध नियमानुसार शासनास महसूल अदा करणारा रिक्षाचालक या काळात उपासमारीने त्रस्त झाला. लॉकडाऊन संपल्यानंतर आपत्ती व्यवस्थापन कायद्या अंतर्गत प्रवासी वाहतुकीवर निर्बंध आणल्याने पुरेसा व्यवसायही मिळेनासा झाला आहे. या कठीण काळात रिक्षाचालकाला शासनाच्या मदतीची व सहकार्याची अत्यंत आवश्यकता असून सोलापुरातील रिक्षा चालकांचे अनुदान मागणीचे विनंती अर्ज या पत्रासोबत आपणाकडे सादर करत असून या अर्जानुसार रिक्षा चालकांना 10 हजार रुपये अनुदान शासनाच्यावतीने मिळवून द्यावे, अशी मागणी करत असल्याचे माजी आमदार नरसय्या आडम मास्तर यांनी सांगितले.
