प्रयागराज : उमेश पाल हत्याकांडातील आरोपी बाहुबली अतिक अहमद आणि त्याचा धाकटा भाऊ खालिद अझीम उर्फ अशरफ सध्या पोलीस कोठडीत आहेत. गुरुवारी रात्रीपासून पोलिस या दोघांची चौकशी करत आहेत. कोठडी रिमांड दरम्यान, पोलीस या दोघांकडून उमेश पालची हत्या का केली, हत्येच्या कटात कोण सहभागी आहे, हे जाणून घेण्याचा प्रयत्न करत आहेत. याशिवाय अतिक अहमदकडून पाकिस्तानातून शस्त्रास्त्रे आणि काडतुसे मिळाल्याचे प्रकरणही समोर आले आहे. पोलीस याबाबतही माहिती गोळा करण्याचा प्रयत्न करत आहेत. पोलिसांनी दोघांना 15 तासात 15 प्रश्न विचारले. मात्र, दोघांनीही बहुतांश प्रश्नांची उत्तरे देण्याचे टाळले.
दोघांची समोरासमोर बसून चौकशी : अतिक आणि अशरफ यांना रिमांडवर घेतल्यानंतर पोलिसांनी दोघांना थेट धूमगंज पोलिस ठाण्यात नेले. येथे पोलिसांची अनेक पथके सतत अतिक आणि अशरफ यांची चौकशी करत आहेत. गुरुवारी रात्री अकराच्या सुमारास अतिक आणि अशरफसह पोलिसांचे पथक पोलिस ठाण्यात पोहोचले. यानंतर पोलिसांनी पहाटेपर्यंत त्यांना 10 प्रश्न विचारले. पोलिसांनी दोघांची वेगवेगळ्या खोलीत चौकशी केली. यानंतर शुक्रवारी पहाटे दोघांची समोरासमोर बसून चौकशी करण्यात आली.
पोलिसांनी अतिक आणि अश्रफ यांना विचारलेले प्रश्न :
- उमेश पालचा खून का केला?
- उमेश पाल यांच्या हत्येचा कट कधी रचला?
- उमेशसोबत उपस्थित पोलिसांना मारण्याचे आदेश कोणी दिले?
- हत्या घडवून आणणाऱ्या टीमचा प्रमुख कोण होता?
- घटनेच्या वेळी किती लोक तुमच्यासोबत उपस्थित होते?
- प्लॅनमध्ये काही अडथळा आल्यास बॅकअपसाठी काय योजना होती?
- जे सीसीटीव्हीत कैद झाले आहेत त्यांच्या व्यतिरिक्त घटनेच्या वेळी किंवा घटनास्थळाजवळ इतर कोण कोण होते?
- ही हत्या करण्यासाठी शूटर्सची निवड कोणी केली होती?
- घटनेपूर्वी आणि नंतर हत्या करणाऱ्या शूटर्सना कोणी आर्थिक मदत केली?
- घटनेनंतर कोण कोणाच्या मदतीने पळून गेला? पळून जाण्यासाठी वाहनांची व्यवस्था कोणी केली?
- घटनेत वापरण्यात आलेल्या बंदुका कुठून आल्या? गोळीबार करणाऱ्यांना बंदुका कोणी दिल्या?
- पाकिस्तानातून शस्त्रे आणि काडतुसे कशी मिळाली?
- पाकिस्तानातून येणारी शस्त्रे आणि काडतुसे अतिकच्या टोळीपर्यंत कशी पोहोचली?
- पाकिस्तानातून आलेली शस्त्रे तुम्ही स्वत: वापरलीत की दुसऱ्याला पुरवलीत, पाकिस्तानी शस्त्रे कोणाला विकली?
- पाकिस्तानी तस्करांशी कोणाच्या माध्यमातून संपर्क केला आणि त्यांनी त्यांना पैसे कसे दिले?
प्रश्नांची स्पष्ट उत्तरे दिली नाहीत : पोलिसांच्या 15 तासांच्या चौकशीत अतिक आणि अशरफ यांनी एकाही प्रश्नाचे थेट उत्तर दिले नाही. ते प्रत्येक प्रश्नाला गोलगोल पद्धतीने उत्तर देत राहिले. अतिक आणि अशरफ यांनी कबूल केले की त्यांनी उमेश पाल यांच्याशी तडजोड करण्याचा अनेकदा प्रयत्न केला होता. यात त्यांना यशही आले होते, पण उमेश पाल वेळेवर पलटले. यामुळे त्यांना धडा शिकवावा, असे त्यांनी ठरवले. मात्र 2017 पासून तुरुंगात गेल्याने तो काहीच करू शकला नाही.
पाकिस्तानातून आणलेल्या शस्त्रास्त्रांचीही माहिती मिळाली : चौकशीदरम्यान अतिक अहमद आणि अशरफ यांना पाकिस्तानातून शस्त्रे आणि काडतुसे आणल्याबाबतही प्रश्ने विचारण्यात आली. पाकिस्तानातून ड्रोनच्या मदतीने पंजाबमध्ये परदेशी शस्त्रे पाठवली जात असल्याची माहिती पोलिसांना मिळाली होती. तेथून शस्त्रे अतिक अहमदकडे पोहचवण्यात आली. त्याच्या बदल्यात पाकिस्तानी हँडलरच्या खात्यात पैसे ट्रान्सफर करण्यात आले. पैशाच्या व्यवहारासाठी वापरल्या गेलेल्या बँक खात्याचा शोध घेण्याचाही पोलीस प्रयत्न करत आहेत. अतिक आणि अशरफ यांनी चौकशीत बँक खात्याची स्पष्ट माहिती दिली नाही, परंतु पाकिस्तानमधील हँडलरला ज्या व्यक्तीद्वारे पैसे हस्तांतरित केले गेले त्या व्यक्तीची माहिती निश्चितपणे दिली आहे.
