हैदराबाद : तेलुगु राष्ट्र समितीच्या आमदार के कविता (TRS MLC K Kavitha) यांनी सीबीआयला पत्र लिहिले आहे की (K Kavitha letter to CBI), त्यांच्या व्यस्त वेळापत्रकामुळे त्या 6 डिसेंबर रोजी चौकशीसाठी उपस्थित राहू शकत नाही. त्यांनी एजन्सीला सांगितले की त्या या महिन्याच्या 11, 12, 14 किंवा 15 डिसेंबर रोजी हैदराबाद येथील त्यांच्या निवासस्थानी संबंधित अधिकाऱ्यांना भेटू शकतील.
हैदराबाद येथील निवासस्थानी भेटू शकतात : दिल्ली उत्पादन शुल्क धोरण घोटाळ्याची चौकशी करणाऱ्या केंद्रीय अन्वेषण विभागाने (CBI) शुक्रवारी मुख्यमंत्री के चंद्रशेखर राव यांच्या कन्या कविता हिला 6 डिसेंबर रोजी चौकशीसाठी नोटीस बजावली होती. तपास संस्थेने सीआरपीसीच्या कलम 160 अंतर्गत नोटीस जारी केली आहे. त्यांना त्या दिवशी सकाळी 11 वाजता चौकशीसाठी त्यांच्या सोयीनुसार ठिकाण सूचित करण्यास सांगितले होते. कविताने एका निवेदनात म्हटले आहे की, तिने अधिकाऱ्यांना कळवले आहे की ते तिला तिच्या हैदराबाद येथील निवासस्थानी भेटू शकतात.
कोणत्याही प्रकारच्या चौकशीला तयार : या प्रकरणी 1 डिसेंबरला कविता म्हणाल्या होत्या की, "आम्ही कोणत्याही प्रकारच्या चौकशीला सामोरे जाऊ. एजन्सी आल्या आणि आम्हाला प्रश्न विचारले तर आम्ही नक्कीच उत्तर देऊ. पण माध्यमांना निवडक लीक्स देऊन नेत्यांची प्रतिमा मलिन केली तर लोकं याचा विरोध करतील. भाजपने लोकशाही पद्धतीने निवडून आलेली आठ राज्यातील सरकारे पाडली आणि मागच्या दरवाजाच्या राजकारणातून सत्ता हिसकावून घेतली. मी मोदींना विनंती करते की त्यांनी ही वृत्ती बदलली पाहिजे. ईडी आणि सीबीआयचा वापर करून निवडणुका जिंकणे शक्य नाही. तेलंगणातील लोकं हुशार आहेत. आम्हाला तुरुंगात टाकलं तर जास्तीत जास्त काय होईल? आम्हाला फाशी देणार का? यात घाबरण्यासारखे काही नाही."
ईडीचा तपास : आतापर्यंत केलेल्या तपासानुसार, विजय नायर यांनी आपच्या नेत्यांच्या वतीने अमित अरोरा यांच्यासह साऊथ ग्रुप (सरथ रेड्डी, सुश्री के. कविता, मागुंता श्रीनिवासुलु रेड्डी नियंत्रित) नावाच्या गटाकडून 100 कोटी रुपये घेतले आहेत, असे ईडीने म्हटले आहे. ईडीच्या म्हणण्यानुसार, अमित अरोरा यांनी त्यांच्या बयाना दरम्यान हे उघड केले आहे.
