नवी दिल्ली - आयुष मंत्रालय 2016 पासून दरवर्षी धनत्रयोदशीच्या निमित्ताने 'आयुर्वेद दिवस' साजरा करते. यंदा आज म्हणजेच 13 नोव्हेंबर रोजी हा दिवस साजरा करण्यात आला. पंतप्रधान नरेंद्र मोदी यांनी आज पाचव्या आयुर्वेद दिवसाच्या निमित्ताने दोन आयुर्वेद संस्था देशाला समर्पित केल्या. गुजरातच्या जामनगरमधील भारतीय आयुर्वेद शिक्षण आणि संशोधन (आयटीआरए) आणि राजस्थानमधील जयपूरची राष्ट्रीय आयुर्वेद संस्थेचे त्यांनी आज उद्घाटन केले. यावेळी त्यांनी देशवासीयांना संबोधित केले. आयुर्वेद हा देशाच्या आरोग्य धोरणाचा महत्त्वाचा हिस्सा आहे, असे ते म्हणाले.
सविस्तर वाचा - आयुर्वेद दिवस : 'देशाच्या आरोग्य धोरणामध्ये आयुर्वेदाचा महत्त्वाचा वाटा'
इस्लामाबाद - पाकिस्तानने 1 हजार 210 मोस्ट वाँडेट दहशतवाद्यांच्या नावांची यादी जाहीर केली आहे. या यादीत मुंबई दहशतवादी हल्ल्यातील आंतकवाद्यांचा समावेश आहे. ही यादी केंद्रीय तपास संस्थेच्या (एफआयए) दहशतवादीविरोधी पथकाने जारी केली आहे. या यादीत लंडनमध्ये वास्तव्यास असलेले मुत्ताहिदा कौमी मूव्हमेंट (एमक्यूएम) चे नेता अल्ताफ हुसैन आणि मुस्लिम लीग-नवाज (पीएमएल-एन) चे कार्यकर्ता नासिर बट्ट यांचाही समावेश आहे
सविस्तर वाचा - पाकिस्तानकडून 1 हजार 210 मोस्ट वाँडेट दहशतवाद्यांच्या नावांची यादी जाहीर
मुंबई - दिशा सालियन आत्महत्याप्रकरणी मुंबई पोलिसांकडून लवकरच न्यायालयात क्लोजर रिपोर्ट सादर करण्यात येणार आहे. दिशा एकेकाळी बॉलिवूड अभिनेता सुशांत सिंग राजपूत याची मॅनेजर म्हणून काम पाहत होती. दिशा सालीयन हिने 8 जून रोजी तिने राहत्या घराच्या इमारतीवरून उडी मारून आत्महत्या केली होती. यानंतर दिशा सालियानच्या मृत्यू प्रकरणी अनेक आरोप-प्रत्यारोप करण्यात आले होते.
सविस्तर वाचा - दिशा सालियान आत्महत्या प्रकरणी मुंबई पोलीस दाखल करणार क्लोजर रिपोर्ट
औरंगाबाद - दिवाळीच्या रणधुमाळीत केंद्रीय राज्यमंत्री रावसाहेब दानवे यांनी राजकीय फटकेबाजीची आतिषबाजी ऐकायला मिळाली. मुख्यमंत्री उद्धव ठाकरे कोणाचा बाप काढू शकत नाही, त्यामुळे त्यांनी माझा बाप काढला, अशी टीका केंद्रीय राज्यमंत्री रावसाहेब दानवे यांनी जाहीर भाषणात केली.
सविस्तर वाचा - पहिले दाऊदचा बाप काढायचे, मग नवाज शरीफचा, आता हिंदुत्व गेल्याने आमचा बाप काढावा लागतो..
मुंबई - युरोपीय देशात कोरोनाच्या दुसऱ्या लाटेने कहर सुरू केला आहे. पहिल्या लाटेपेक्षा दुसऱ्या लाटेचा उद्रेक अधिक गंभीर आहे. ही लाट आपल्या देशात येत्या काही महिन्यांमध्ये येण्याची शक्यता असल्याने त्या पार्श्वभूमीवर राज्य सरकारने युद्धपातळीवर पूर्वतयारी सुरू केली आहे. राज्याच्या सार्वजनिक आरोग्य विभागाने प्रत्येक जिल्हा आणि महानगरपालिकेने आपल्या कार्यक्षेत्रात अनेक प्रकारच्या खबरदारी घेण्याचे आदेश जारी केले आहेत.
सविस्तर वाचा - कोरोनाच्या दुसऱ्या लाटेपूर्वीच युद्धपातळीवर तयारी; सार्वजनिक आरोग्य विभागाने दिले 'हे' आदेश
पाटणा - बिहार विधानसभेचा निकाल लागल्यानंतर राष्ट्रीय जनता दलाचे (आरजेडी) नेते तेजस्वी यादव यांनी प्रथमच नवनिर्वाचित आमदारांसोबत बैठक घेतली. त्यांनी महागठबंधनला मतदान केलेल्या मतदारांचे जाहीरपणे आभार मानले. यावेळी त्यांनी निवडणूक प्रक्रियेत गैरव्यवहार केल्याचा आरोप निवडणूक आयोगावर केला. जनतेने महागठबंधनला विजयी केले. मात्र, निवडणूक आयोगाने एनडीएला विजयी घोषित केले, असा आरोप त्यांनी केला.
सविस्तर वाचा - 'जनतेने आम्हाला कौल दिला, मात्र, निवडणूक आयोगानं एनडीएला जिंकवलं'
मुंबई - आयपीएल विजेता मुंबई इंडियन्स संघाचा खेळाडू कृणाल पांड्याला महसूल गुप्तचर संचालनालयाच्या (DRI) पथकाने मुंबई विमानतळावर ताब्यात घेतले आहे. कृणाल पांड्याकडे युएईहून येताना सोन्याचे दागिने सापडले. यामुळे ही कारवाई करण्यात आली आहे.
सविस्तर वाचा - युएईमधून आणलं सोनं; क्रिकेटपटू कृणाल पांड्या महसूल गुप्तचर संचालनालयाच्या ताब्यात
हैदराबाद - देशात काल २४ तासात ४७ हजार ९०५ नवे कोरोनाबाधित रुग्ण आढळले होते, तर ५२ हजार ७१२ नागरिक कोरोनातून बरे झाले आहेत. त्यातील ७८ टक्के रुग्ण हे १० राज्यांमधील आणि केंद्रशासित प्रदेशांमधील आहेत. दरम्यान, कोरोनाविरुद्ध लस शोधण्यासाठी अर्थमंत्री निर्मला सितारामण यांनी बायोटेक्नॉलॉजी विभागाला ९०० कोटींचे अनुदान देण्याची घोषणा केली आहे.
सविस्तर वाचा - देशात ४७ हजार ९०५ नव्या कोरोनाबाधितांची नोंद; ५२ हजार रुग्ण बरे
धर्मशाला (हि.प्र) - बॉलिवूड अभिनेता आसिफ बसरा यांनी आत्महत्या केली आहे. त्यांचा मृतदेह गळफास घेतलेल्या अवस्थेत जिल्ह्यातील मैक्लोडगंज येथील एका घरात सापडला आहे. आसीफ या घरात त्यांच्या एका विदेशी मैत्रिणीबरोबर किरायाने राहात होते. त्यांनी आत्महत्या का केली, याचे कारण अद्याप अस्पष्ट आहे.
सविस्तर वाचा - अभिनेता आसिफ बसरांनी केली आत्महत्या; गळफास घेतलेल्या अवस्थेत आढळला मृतदेह
नवी दिल्ली - दिवाळी सणापूर्वी केंद्रीय अर्थमंत्री निर्मला सीतारामन यांनी आत्मनिर्भर भारत रोजगार पॅकेज ३.० आज जाहीर केले. यावेळी जाहीर केलेल्या १२ आर्थिक उपाय योजनांमधून २.६५ लाख कोटींचे आर्थिक प्रोत्साहन मिळेल, अशी त्यांनी अपेक्षा व्यक्त केली आहे. केंद्र सरकारने आत्मनिर्भर भारत अभियान ३.० ची घोषणा करण्यामागे अर्थव्यवस्थेला चालना देण्याचा हेतू आहे. जाणून घेऊ, या योजनेतून नेमके कोणत्या उद्योगांना व वैयक्तिक काय मिळणार आहे?
सविस्तर वाचा - आत्मनिर्भर भारत ३.० : जाणून घ्या, आर्थिक पॅकेजच्या घोषणेतून कोणाला काय मिळणार आहे?
